Qazaqstan BAÁ-nyń Sýdandaǵy rezıdentsııasyna jasalǵan áýe shabýylyn aıyptady
ASTANA. KAZINFORM – Qazaqstan Respýblıkasy Syrtqy ister mınıstrliginiń Birikken Arab Ámirlikteriniń Sýdandaǵy dıplomatııalyq mıssııasy basshysynyń rezıdentsııasyna áýe shabýylyna qatysty málimdeme jasady. Bul týraly vedomstvonyń baspasóz qyzmeti málim etti.
— Qazaqstan Respýblıkasynyń Syrtqy ister mınıstrligi 2024 jylǵy 29 qyrkúıekte Sýdan astanasy Hartýmdaǵy Birikken Arab Ámirlikteri dıplomatııalyq mıssııasy basshysynyń rezıdentsııasyna jasalǵan áýe shabýylyn qatań aıyptaıdy. Dıplomatııalyq mıssııalar men olardyń qyzmetkerlerine qatysty zorlyq-zombylyqtyń kez kelgen kórinisine jol berýge bolmaıdy dep sanaımyz. Mundaı áreketter 1961 jylǵy Dıplomatııalyq qarym-qatynastar týraly Vena konventsııasynyń 22-babynda kepildik berilgen dıplomatııalyq ókildikterge qol suǵylmaýshylyq negizgi qaǵıdasyn buzady jáne barlyq qatysy bar tulǵalardyń jaýapkershilikke tartylýymen tolyq tergeý júrgizýdi talap etedi, - delingen habarlamada.
Buǵan deıin Birikken Arab Ámirlikteriniń (BAÁ) Syrtqy ister mınıstrligi Sýdan áýe kúshteriniń ushaǵy Hartýmdaǵy ámirlik dıplomatııalyq ókildigi basshysynyń rezıdentsııasyna soqqy bergeni týraly TASS habarlaǵan bolatyn.
