Qazaqstan azamattardyń ál-aýqatyn qamtamasyz etý boıynsha álemdik reıtıngte 69-oryn aldy

ASTANA. QazAqparat – Álem halqynyń qajettilikteri qanshalyqty qamtamasyz etilip otyrǵany jaıly zertteý jarııalandy. Bul reıtıngke qatysqan 170 eldiń ishinde Qazaqstan 69-oryn alǵan, dep habarlaıdy QazAqparat.

Ulybrıtanııanyń The Economist basylymynyń málimetinshe, Social Progress Imperative kommertsııalyq emes uıymy 24 mamyrda 170 eldegi úkimetter óz azamattaryna kórsetetin qyzmetterdi saraptap, málimetterin jarııalady.

Bul derekterdiń ereksheligi - ol eldiń jalpy ishki ónimine negizdelmegen. Onyń ornyna zertteý 52 ındıkatordy qamtıdy jáne olardy teń salmaq bere otyryp, úsh sanatqa bóledi: adamnyń negizgi qajettilikteri (azyq-túlik jáne sý), uzaq merzimdi damý negizderi (bilim jáne densaýlyq saqtaý) jáne «múmkindikter» (jeke quqyqtary men bostandyqtaryn qosa alǵanda).

Memleket tarapynan óz azamattaryna kórsetiletin áleýmettik ál-aýqat deńgeıin esepteıtin osy halyqaralyq reıtıngte Qazaqstan 170 eldiń ishinde 69-oryn ıelendi. Aıta keteıik Qazaqstannyń kórsetkishi Belarýs (62) pen Reseıden (65) tómen, biraq Brazılııa (75), Birikken Arab Ámirlikteri (82), Túrkııa (87) jáne Qytaı (107) syndy elderden joǵary bolyp shyqty. Kórshiles elder arasynan Qyrǵyzstan 91, Ózbekstan 102, Ázerbaıjan 108, Túrikmenstan 116, Tájikstan 132-orynda.

Jalpy halyqaralyq reıtıngte Shveıtsarııa kósh bastap tur, odan keıin Norvegııa men Danııa úzdik úshtikke kirgen. Alǵashqy ondyqta sondaı-aq Islandııa, Germanııa, Fınlıandııa, Shvetsııa, Nıderlandy, Kanada jáne Avstrııa bar.