Qazaqstan avtoparki eskirip barady: Jańa kólikti nesıege qalaı tıimdi alýǵa bolady

NUR-SULTAN. QazAqparat - Jaz aılaryna qaraı elimizde 3,88 mln avtomobıl tirkeldi. Bul bir jyl burynǵy kórsetkishten 2,9 paıyzǵa kóp, dep habarlaıdy QazAqparat tilshisi ranking.kz-ke silteme jasap.

Elimizdiń avtoparkiniń úshten ekige jýyǵyn shyǵarylǵanyna 10 jyldan asyp ketken eski kólikter quraıdy. Al zaýyttan shyqqanyna 3 jyl bola qoımaǵan avtomobılderdiń sany elimizdegi jalpy kólikterdiń nebári 10,9 paıyzyn qurap otyr. 3-7 jyl aralyǵynda kólikterdiń úlesi – 15,2 paıyz, 7-10 jyl aralyǵyndaǵy kólikterdiń úlesi – 6,4 paıyz.

Jańa kólik satyp alǵysy keletin qazaqstandyqtarǵa bankter arnaıy nesıe ónimderin usynady. Elimizdegi nesıe beretin eń iri 10 banktiń arasynda 5 ekinshi deńgeıli bank (EDB), atap aıtqanda Eýrazııa banki, TsentrKredıt bank, Halyq banki, ATF banki jáne Sberbank jalaqy jobasynan tys jańa avtomobıl satyp alýǵa avtonesıe usynady.

Bul rette, Sberbank jyldyq eń tómengi tıimdi stavkany – 19,4, Halyq banki – 21,2, al TsentrKredıt banki 21,9 paıyz mólsherinde usynady.

Jańa avtomobıl qunynyń 10 paıyzy mólsherinde eń tómengi alǵashqy jarnany Sberbank pen Eýrazııa banki talap etedi. Al bul mólsher TsentrKredıt banki, Halyq banki jáne ATF bankinde 20 paıyzdy quraıdy.

Beriletin zaım somasy úsh bankte naqty kórsetilgen: Halyq banki men Eýrazııa bankinde - 30 mln teńgege deıin, ATF bankinde - 15 mln teńgege deıin.

Zaımdy óteý merzimi 36 aıdan bastap 84 aıǵa deıingi aralyqty qamtıdy.