Qazaqstan aýyldarynyń oqýshylaryna aǵylshyn tili úıretiledi

ASTANA. QazAqparat - Sheteldikter Qazaqstannyń aýyl mektepteriniń oqýshylaryna aǵylshyn tilin úıretetin bolady. Bul jóninde OKQ-da «Jas Otan» Jastar qanatynyń tóraǵasy Danııar Súndetbaev málim etti, dep habarlaıdy QazAqparat tilshisi.

«Elbasy aǵylshyn tilin tereńdetip oqý jalpyálemdik trendke aınalǵanyn erekshe atap ketti. Bizdiń joba boıynsha áriptesimiz «Bolashaqpen» birigip jasap jatqan jumysymyz bilimdi, básekege qabiletti jastardy tárbıeleýge baǵyttalǵan. Sondyqtan «Jastar-Otanǵa» jastar saıası lageri aıasynda «English for Jastar» jobasyn iske qostyq», - dedi Danııar Súndetbaev.

«Jas Otan» Jastar qanatynyń atqarýshy hatshysy Dáýlet Káribektiń aıtýynsha, jobanyń negizgi maqsaty - oqýshylardyń aǵylshyn tilinen deńgeıin kóterip, kommýnıkatsııalyq daǵdylaryn jaqsartý.

«Joba 84 aýyldyń 7000 oqýshysyna arnalǵan. Qazirgi ýaqytta joba mindetterin júzege asyrý úshin aǵylshyn tilin joǵary deńgeıde meńgergen otandyq 141 maman tartyldy», - dedi D. Káribek.

«Bolashaq» qaýymdastyǵynyń atqarýshy dırektory Laýra Demesinovanyń aıtýynsha, aǵylshyn tilinde sóleıtin 28 adam men qatarynda QR Parlamenti Májilisiniń depýtaty, olımpıada chempıony Serik Sápıev bar 140-tan astam otandyq mamandar 2018 jylǵy qarasha aıynan bastap 9-11 synyp oqýshylaryna til úıretýge attanady.

Sabaqtar tek balalardyń qoly bos kezinde oqytylyp, negizgi oqý protsesine kedergi keltirmeıdi.

Jobaǵa akademııalyq turǵydan «Interpress» til ortalyǵy qoldaý kórsetti. Oqýshylar ortalyqqa tıesili Oxford University Press (Anglııa) baspasynyń «Solutions» atty oqýlyqtarymen bilim alatyn bolady.