Qazaqstan aýmaǵyndaǵy asfalt-beton zaýyttary tolyq tekseriledi

ASTANA. KAZINFORM – Jol aktıvteri sapasynyń ulttyq ortalyǵy Qazaqstan aýmaǵyndaǵy asfalt-beton zaýyttaryn tekserip jatyr.

«Bıyl jol-qurylysy maýsymy sý tasqynyna baılanysty tótenshe jaǵdaıda bastaldy. Oǵan qaramastan, QR Kólik mınıstrligi Avtomobıl joldary komıteti «Jol aktıvteri sapasynyń ulttyq ortalyǵy» RMK (JASUO) maýsymdyq jumystarǵa tyńǵylyqty daıyndaldy. Qazirgi kezde Jol aktıvteri sapasynyń ulttyq ortalyǵy Kólik mınıstrliginiń tapsyrmasy boıynsha elimizdegi barlyq asfalt-beton zaýyttaryn tekserýdi bastady. Osy jumystardy júzege asyrý úshin JASUO-nyń aımaqtarda 15 synaq zerthanasy bar. Bıyl jańadan ashylǵan oblys fılıaldarynda taǵy 2 zerthana ashý josparda bar», - delingen atalǵan ortalyqtyń málimetinde.

Kompanııa sarapshylary osy maýsymda jol-qurylys materıaldarynyń respýblıkalyq jeliden 10 000 synamasyn jáne jergilikti joldardan 30 myń synamasyn alyp, zertteý jasaıdy. Jalpy, qazirge deıin JASUO fılıaldary 1,5 myń ınspektsııalyq tekseriske shyqty, 2 myń jol qurylys materıaldary synamasy iriktelip, synaqtan ótkizildi

Sonymen qatar, ınjenerlik-tehnıkalyq qyzmetkerler, sarapshylar men JASUO synaq zerthanalarynyń qyzmetkerleri Qazaqstanda ǵana emes, shetelde de,ıaǵnı avtojol salasynyń ozyq ǵylymı-tehnıkalyq uıymdarynda (Qytaı, Belarýs, Germanııa, Polsha jáne t. b.) tájirıbe jınaqtady.

Taratylǵan málimetke qaraǵanda, 2023 jyldyń qorytyndysy boıynsha 11,4 myń ınspektsııalyq tekseris bolyp (respýblıkalyq jeli – 3,6 myń, jergilikti jeli – 7,8 myń), 40,3 myń JQM synamasy (respýblıkalyq jeli – 10,1 myń, jergilikti jeli – 30,2 myń) iriktelip, synaldy. Ortalyq mamandarynyń tekseris nátıjelerine saı merdiger uıymdar óz qarajaty esebinen 4,1 mlrd teńge somasyna jumystardy qaıta jasady.