Qazaqstan aýyldarynda halyqtyń 37% qaldy
ASTANA. KAZINFORM — «Aýyl» partııasynyń basty maqsaty — eldi agrarlyq derjavaǵa aınaldyrý. Bul týraly partııa tóraǵasy, Májilistegi agrarlyq máseleler komıtetiniń tóraǵasy Serik Egizbaev «Aýyl» partııasynyń 25 jyldyǵyna arnalǵan ǵylymı-praktıkalyq konferentsııada aıtty.
− Aýyl men agrarlyq sektordy damytý — bizdiń qyzmetimizdiń basty baǵyty bolyp qala beredi. Táýelsizdiktiń alǵashqy jyldary oılastyrylmaǵan jappaı jekeshelendirý áleýmettik jáne ekonomıkalyq kúızelisterge alyp keldi jáne agrarlyq salany da qamtydy. Tıimsiz reformalar saldarynan Qazaqstan kartasynan 1,5 myńnan astam aýyl joıylyp ketti. Aýyl turǵyndarynyń, ásirese jastardyń qalalarǵa jappaı kóshýi kúsheıip otyr. Qazir aýylda halyqtyń 37%-dan az bóligi turady, ókinishke qaraı, bul úrdis artyp keledi. Al 90-jyldardyń basynda aýyl turǵyndarynyń úlesi 60%-dan asatyn, − dedi Serik Egizbaev.
Partııa tóraǵasy Qazaqstannyń burynǵydaı agrarlyq elge aınalýy kerektigin basa aıtty. Bul ustanym el Prezıdentiniń strategııalyq baǵytymen tolyq sáıkesedi.
− Qazaqstan aýmaǵy boıynsha álemde 9-orynda, al aýyl sharýashylyǵy jeriniń kólemi boıynsha 6-orynda ekenin jıi aıtamyz. Alaıda osyndaı mol resýrsqa ıe bola otyryp, aýyl sharýashylyǵynyń jalpy ishki ónimdegi úlesi jóninen álemdik reıtıngte tek 43-oryndamyz. Bul kórsetkish boıynsha jeri men resýrstyq múmkindikteri bizden áldeqaıda az kórshi elder aldymyzda tur, − dedi spıker.
Eske salsaq, bıyl elimizde araǵa 18 jyl salyp aýyl sharýashylyǵy sanaǵy ótedi. Sanaqtyń negizgi kezeńi 1 tamyz ben 20 qazan aralyǵyn qamtıdy. Ol onlaın jáne oflaın kezeńderge bólinedi. Eń aldymen 1-31 tamyz aralyǵynda sanaq.gov.kz. saıtynda onlaın-saýalnama júrgiziledi.