Qazaqstan Aýǵanstanǵa avtokólik eksporttamaq
ALMATY. KAZINFORM – Qazaqstan Aýǵanstanǵa otandyq avtokólikterdi jetkizýdi josparlap otyr. Bul týraly Almatyda ótken bıznes forýmy barysynda QR Premer-Mınıstriniń orynbasary Serik Jumanǵarın málim etti.
«Aýǵan tarapynyń usynysy boıynsha, biz Qazaqstanda óndirilgen avtokólik quraldaryn Aýǵanstanǵa jetkizip, keıinnen olardy Aýǵanstanda qyzmet kórsetý ortalyqtarymen birge ornalastyrý máselesin qarastyrýǵa daıynbyz»,- dedi ol.
2024 jyldyń birinshi jartyjyldyǵynda respýblıkada jalpy quny 1,6 mlrd dollar bolatyn 62 435 avtokólik shyǵaryldy.
Serik Jumanǵarın Aýǵanstan delegatsııasynyń Qazaqstanǵa sapary qorytyndysyna sáıkes ekijaqty taýar aınalymyn $3 mlrd-qa deıin arttyrý mindeti qoıylǵan Jol kartasyna qol qoıylǵanyn jetkizdi.
Osyǵan deıin Qazaqstan men Aýǵanstan arasyndaǵy saýda aınalym 330,7 mln dollarǵa jetkeni týraly jazǵan edik.
Sondaı-aq Aýyl sharýashylyǵy vıtse-mınıstri Erbol Tasjúrekov Qazaqstan men Aýǵanstan aýyl sharýashylyq taýar aınalymyn 1 mlrd dollarǵa deıin arttyratynyn aıtqan bolatyn.
