Qazaqstan aýǵan bosqyndaryn qabyldaı ma – SІM jaýaby

NUR-SULTAN. QazAqparat – Elimizdiń Syrty ister mınıstrligi «Qazaqstan aýǵan bosqyndardy qabyldaýy múmkin» degen sybysqa qatysty túsinikteme berdi, dep habarlaıdy QazAqparat tilshisi.

«Whats App messendjerinde taraǵan Almaty nemese Shymkentke aýǵan bosqyndary keleıin dep jatyr» degen aqparat shyndyqqa janaspaıdy. Sondyqtan da azamattardy tek resmı aqparatqa súıenýge shaqyramyz. Resmı aqparatty Syrtqy ister mınıstrliginen nemese jergilikti atqarýshy organdardan bilýge bolady», - dedi QR Syrtqy ister mınıstrliginiń resmı ókili Aıbek Smadııarov tilshilerdiń suraqtaryna jaýap bere turyp.

Onyń aıtýynsha, búginde elimizde aýǵan bosqyndaryn qabyldaý máselesi qaralyp jatqan joq.

«Eger qabyldaý týraly áńgime qozǵalǵan jaǵdaıdyń ózinde Aýǵanstan aýmaǵynda resmı jumys istep jatqan BUU qyzmetkerlerine ǵana qatysty. Onyń ózinde Qazaqstannyń bıligine resmı ótinish bildirgen jaǵdaıda», - deıdi ol.

Buǵan deıin A. Smadııarov Aýǵanstan aýmaǵynda qalyp, elge qaıtqysy kelgen qazaqstandyqtardyń qaıda habarlasýy kerektigin aıtty. Resmı ókildiń sózine sensek, Aýǵanstandaǵy Qazaqstan elshiligi janynan arnaıy komıssııa quryldy.

Aıta ketsek, SІM-niń málimetinshe Memleket basshysy Qasym-Jomart Toqaev Aýǵanstandaǵy qazaqtardy tarıhı otanyna qaıtarýǵa kómek kórsetýdi tapsyrdy.