Qazaqstan aýasy eń lastanǵan 40 eldiń qatarynda tur - Máýlen Áshimbaev
Senat tóraǵasy Máýlen Áshimbaev Qazaqstan aýasy eń lastanǵan 40 eldiń qatarynda turǵanyn málim etti, dep habarlaıdy Kazinform.
Bul týraly ol Qazaqstan Respýblıkasynyń ornyqty damý salasyndaǵy ulttyq maqsattary men mindetteriniń iske asyrylýyna monıtorıng júrgizý kezindegi parlamenttik komıssııanyń "Aýanyń lastanýy - ekologııalyq qaýipsizdikke tóngen qater" taqyrybyna arnalǵan Óskemendegi kóshpeli otyrysynda aıtty.
- Óskemen elimizdegi aýasy eń lastanǵan qalalardyń biri. Sol úshin komıssııa otyrysyn osynda bastap otyrmyz. Halyqtyń ómir súrý sapasyna kúndelikti tynystaıtyn aýa sapasy tikeleı áser etedi. Jyl saıyn kásiporyndar zııandy shyǵaryndylardy azaıtyp keledi, biraq ekologııa máselesi áli de ózektiligin joımady. Búginde Qazaqstan aýasy eń lastanǵan 40 eldiń qatarynda tur, - dedi Máýlen Áshimbaev.
Otyrys barysynda Shyǵys Qazaqstan oblysynda ekologııalyq jaǵdaıdy jaqsartý maqsatynda qandaı sharalardy qolǵa alý kózdelip otyrǵany aıtyldy.
- Óńir boıynsha aýany lastaýshy kásiporyndar qatarynda - "Kaztsınk" JShS eń aldyńǵy qatarda. Shyǵaryndylar 24,3 myń tonnany quraıdy. Bul jalpy shyǵaryndylardyń 47 paıyzy. Sol úshin kásiporynǵa kúkirt qyshqyly zaýytynyń qaldyq gazdaryn tolyq tazartatyn qondyrǵy ornatý josparlanǵan. Sonyń nátıjesinde kúkirt dıoksıdi shyǵaryndylary 1600 tonnaǵa azaıtylady. Al ekinshi orynda turǵan "Óskemen JEO" JShS-nyń zııandy shyǵaryndylary - 15,3 myń tonna. Onda qazandyq qondyrǵysynan shyǵatyn azot oksıdin azaıtý jobasy júzege asyryldy. Osylaısha azot oksıdiniń kontsentratsııasy eki esege tómendedi, - dedi oblys ákimi Ermek Kósherbaev.
Onyń aıtýynsha, atmosferalyq aýanyń sapasyna monıtorıng júrgizý maqsatynda "Qazgıdromedtiń" 15 beketi jumys istep tur. Qolaısyz meteojaǵdaı kezinde aýa synamalary mobıldi jyljymaly zerthanamen alynady.
Birneshe iri kásiporynǵa shyǵaryndylar monıtorınginiń avtomattandyrylǵan júıelerin ornatý aıaqtalýda. Ekologııalyq aqparat AirKZ mobıldi qosymshasy men ınteraktıvti karta arqyly qamtamasyz etiledi.
