Qazaqstan áskerinde jańa oqý jyly bastaldy
Áskerı bólimder men mekemelerde jańa oqý jyly jaýyngerlik daıarlyq sabaqtarynan bastaldy. Ásker qataryna jańa kelgen sarbazdar alǵash ret jaýyngerlik dabyl únin estidi. Jaýyngerlik jáne jumyldyrý daıarlyǵy boıynsha sabaqtar habarlandyrý júıesiniń sapasyn, shtabtar jumysynyń úılesimdiligin, bólimsheler men bólimderdiń turaqty ornalasý pýnktterinen shyǵý jedeldigin tekserýge baǵyttalǵan.
2022 oqý jylynda Qarýly Kúshterdi daıarlaý áskerı qyzmetshilerdiń barlyq sanattaryn: ofıtserlerdi, serjanttar men sarbazdardy qyzmetterine, olardyń kásibı ósýine qaraı mindetterdi oryndaýǵa, áskerlerdiń daıyndyǵyn arttyrýǵa negizdelgen.
Sonymen qatar jedel, jaýyngerlik jáne jumyldyrý daıarlyqtarynyń negizgi kúshi áskerı basqarý organdarynyń jaýyngerlik jumysynyń úılesimdilik deńgeıin arttyrýǵa, shtabtar arasyndaǵy ózara qarym-qatynastarǵa, komandırlerde baǵynysty bólimderdi basqarýda mashyqtanýǵa jáne bólimshelerdi shynaıy jaýyngerlik jaǵdaıǵa keltirýge jumyldyrylady.
Jaýyngerlik daıarlyqtyń jalpy 80 myńnan astam sharalaryn ótkizý josparlanýda, atap ótsek onyń ishinde oqý-jattyǵý, is júzinde oq atý, parashıýtpen sekirý, jattyǵý ushýlary, bólimshelerdiń dalalyq joryqtary, kemelerdiń teńizge shyǵýlary jáne jaýyngerlik mashınalardy júrgizý bar.
Áskerlerdiń jaýyngerlik daıarlyq deńgeıin arttyratyn áskerı, onyń ishinde halyqaralyq oqý-jattyǵýlardy ótkizý basty nazarda. Qurlyq áskerleriniń, Áýe qorǵanysy kúshteriniń, Áskerı-teńiz kúshteriniń, arnaıy maqsattaǵy bólimsheleri Ujymdyq qaýipsizdikke shart uıymy aıasyndaǵy oqý-jattyǵýlar barysynda ózara is-qımyl máselelerin pysyqtaıdy.
Aldaǵy jyl josparynda Arnaıy operatsııalar kúshteri quramalarynyń keshendi tekserýi, eki kezeńdi jáne ekijaqty komandalyq-shtabtyq oqý-jattyǵýlar, «Aıbar» jedel-strategııalyq arnaıy oqý-jattyǵýy, «Beket» daǵdarystyq jaǵdaılarǵa den qoıý jónindegi keshendi oqý-jattyǵýy, sondaı-aq Shyǵys óńiriniń basqarý organdarymen jáne áskerlerimen jumyldyrý oqý-jattyǵýyn ótkizý kózdelgen. Bir jyl ishinde meńgergen mashyqtaryn áskerler daıarlyqtyń sońǵy kezeńi «Aıbalta-2022» strategııalyq komandalyq-shtabtyq oqý-jattyǵýynda kórsetedi.
Qazaqstandyq áskerı qyzmetshiler ózderiniń kásibı daıarlyq deńgeıin álemniń 40-tan astam eldiń úzdik áskerı mamandary qatysatyn Armııa halyqaralyq oıyndarda da dáleldeıdi.
Kelesi jyly jalpy áskerı quramalar men Qurlyq áskerleriniń bólimderi «Mergen batalony» saıysynda jeńiske jetý úshin baǵyn synamaq. Jarys baǵdarlamasyna jaýyngerlik mashınalardyń qarýynan, atys qarýynan oq atý jattyǵýlaryn oryndaý jáne mınaatqysh batareıalary ofıtserleriniń keshendi atys tapsyrmalaryn sheshýdegi daǵdylaryn baǵalaý kiredi.
Quramalar men bólimderdi kenetten tekserý tájirıbesi saqtalady. Áskerlerdiń jaýyngerlik atysty, onyń ishinde túngi jaǵdaılarda atys júrgize otyryp, tájirıbelik is-qımyldardy pysyqtaý maqsatynda qaıta toptaý jáne beıtanys polıgondarǵa jiberý múmkindikteri baǵalanady.
Jaýyngerlik daıarlyq erekshelikterinde qazirgi zamanǵy qarýly qaqtyǵystardyń tájirıbesin eskerý arqyly áskerler is-qımylynyń jańa tásilderin jetildirý, mergenderdi, ushqyshsyz ushý apparattary operatorlaryn daıarlaýdy jetildirý, áskerı qyzmetshiler men bólimshelerdiń atys daıarlyǵynyń elementi retinde áskerı taktıkalyq atysty odan ári damytý bar.
Áskerlerdiń qyzmeti kúrestiń negizgi baǵyttaryn, vırýstyń jańa shtamdaryn jáne pandemııanyń odan ári órshýiniń oryn alýy yqtımal ahýaldy eskere otyryp, COVID-19-ǵa qarsy is-qımyl sharalaryn qarastyrady.
