Qazaqstan arpa eksportyn eki esege arttyrdy

ASTANA. KAZINFORM – 2024–2025 jylǵy marketıngtik maýsymnyń aǵymdaǵy kezeńinde Qazaqstan 1,82 mln tonna arpa eksporttady. Bul kórsetkish ótken maýsymdaǵy kólemnen eki esege artyq.

Aýyl sharýashylyǵy mınıstrliginiń málimetinshe, eksporttyń ósýine úsh negizgi faktor yqpal etken: 3,84 mln tonna kóleminde joǵary ónim alynýy, Iran men Qytaı tarapynan suranystyń artýy jáne qazaqstandyq arpanyń baǵalyq básekege qabilettiligi.

Atap aıtqanda, Iranǵa jóneltilgen arpa kólemi 1,064 mln tonnany qurap, ótken maýsymmen salystyrǵanda 30 esege ósken. Qytaıǵa – 414,4 myń tonna, al Ózbekstanǵa – 125,2 myń tonna arpa eksporttalǵan.

Eksport kóleminiń artýy ishki naryqtaǵy baǵanyń ósýine oń áser etti. 2024 jylǵy qyrkúıekte tonnasy 50–52 myń teńge bolsa, 2025 jylǵy tamyzdyń basynda bul kórsetkish 85–87 myń teńgege deıin jetti.

Jyl qorytyndysy boıynsha arpa eksporty 1,9 mln tonnaǵa jetedi dep kútilýde.

Saladaǵy turaqtylyqty saqtaý maqsatynda «Azyq-túlik kelisimshart korporatsııasy» UK» AQ ishki naryqqa 500 myń tonna bıdaı jáne 200 myń tonna jemdik astyq (bıdaı men arpa) shyǵaryp, baǵanyń teńgerimdi saqtalýyn qamtamasyz etip otyr.

Astyq baǵasynyń kóterilýi aýyl sharýashylyǵy óndirýshilerine de oń áserin tıgizip otyr. Bul fermerlerdiń rentabeldiligin saqtap qana qoımaı, qosymsha qaryzsyz aǵymdaǵy shyǵyndardy óteýge jáne ınfraqurylymǵa ınvestıtsııa salýǵa múmkindik berýde.

Aıta keteıik, álemdik naryqta bıdaı men arpanyń baǵasy kún saıyn ósip keledi.