Qazaqstan armııasy qandaı drondardy paıdalanady

NUR-SULTAN. QazAqparat – Qorǵanys mınıstrligi jaýyngerlik maqsatta paıdalanylatyn ushqyshsyz ushý apparattarymen tanystyrdy, dep habarlaıdy QazAqparat vedomstvonyń baspasóz qyzmetine silteme jasap.

Qazaqstannyń Qarýly kúshterinde ushqyshsyz avıatsııalyq júıelerdi engizý jáne damytý boıynsha belsendi jumys júrgizilip jatyr.

«Ushqyshsyz ushý apparattarynyń paıda bolýy áskerler men qarý-jaraqty qoldanýda jańashylyq boldy. Búginde olar qarýly qaqtyǵystarda da, sondaı-aq is-sharalardyń qaýipsizdigin qamtamasyz etý úshin de keńinen qoldanylady. Qarý-jaraqtyń bul túri Qazaqstan áskerinde belsendi túrde engizilip keledi. Qarýly kúshterdiń Qurlyq áskerleri «SkyLark» taktıkalyq ózdiginen ushatyn apparatpen jabdyqtalǵan. Ol 10 sharshy shaqyrym aýmaqty baqylaýǵa arnalǵan, bazadan 40 shaqyrym qashyqtyqta birneshe júzdegen metr bıikten jerdegi adamdardy kórýge jáne sýretti operatordyń monıtoryna berýge qabiletti.

Áskerı-áýe kúshteriniń esebinde «WingLoong» barlaý-soqqy berý kesheni bar. Ol áýe barlaýyn júrgizý mindetterin ǵana oryndap qoımaı, basqarylatyn zymyrandar jáne bombalarmen joǵary dáldikte soqqy berýge de qabiletti», delingen habarlamada.

Vedomstvonyń málimdeýinshe, ózdiginen usha alatyn apparattar arnaıy ınfroqurylymdy talap etpeıdi. Bul rette olar, jaýyngerlik tıimdilikti aıtarlyqtaı arttyryp, avıatsııa júktesin tómendetedi. Olar maqsatty aıqyndaýǵa, artıllerııa atysyn túzetýge, jerdegi nysanaǵa soqqy berýge, asa mańyzdy nysanalar men olardyń elementterin jedel tereńdikte joıý úshin qoldanylady.

«Koronavırýs pandemııasyna baılanysty tótenshe jaǵdaı kezinde QR Qarýly Kúshterinen ushqyshsyz ushý aparattarynyń esepteri tartyldy. Olardyń kómegimen 80-ge jýyq buzýshylyq anyqtaldy. Atap aıtqanda karantın aımaqtarynan tys jerlerge ruqsatsyz adamdardyń jáne kólikterdiń shyǵýy anyqtalǵan», delingen habarlamada.

Ushqyshsyz ushý apparattaryn qamtamasyz etý men paıdalaný boıynsha mamandardy Áýe qorǵanysy kúshteriniń Áskerı ınstıtýty daıarlaıdy.

Taraz qalasynda ushqyshsyz ushý apparattaryn daıyndaý jáne jaýyngerlik qoldaný ortalyǵy quryldy. Ol jerde operatorlar biliktiligin arttyryp, nusqaýshylardy oqytady. Sondaı-aq jyl saıyn oqý-ádistemelik jıyndar da ótkiziledi.

«Qazaqstandyq áskerı qyzmetshiler biliktilikterin Armııa halyqaralyq oıyndary barysynda da shyńdaı túsedi. Qazaqstan jyl saıyn elimizde ótkiziletin «Suńqar ańshylyǵy» ushqyshsyz ushý apparattaryn esepteý saıysynyń bastamashysy boldy. 2017 jyldan 2019 jylǵa deıin Qarýly kúshteriniń komandasy saıysta birinshi orynǵa ıe bolýy, bul bizdiń elimizde qarý-jaraqtyń osy túrin tabysty qoldaný men damýyn aıqyndaı túsedi», delingen habarlamada.