Qazaqstan arqyly Ázerbaıjanǵa: transkaspıı baǵyty boıynsha Qytaıdan alǵashqy poıyz attandy
ASTANA.KAZINFORM — Shansı provıntsııasynan transkaspıı baǵyty boıynsha júk poıyzy alǵash ret jolǵa shyqty. Ol Qazaqstan arqyly ótedi, dep habarlaıdy Sınhýa.
Salmaǵy 1159 tonna bolatyn fotoelektrli akkýmýlıatorlar jınaǵy bar 50 standartty konteıner tıelgen poıyz Qytaıdyń soltústigindegi Shansı provıntsııasynyń Tszınchjýn qalasynan Ázerbaıjan astanasy Bakýge jol tartty, bul provıntsııanyń Transkaspıı baǵyty boıynsha Qytaı-Eýropa temirjol tasymalynyń iske qosylǵanyn bildiredi.
Jergilikti Huayuan International Land Port kompanııasynyń baspasóz qyzmetiniń habarlaýynsha, poıyz Chjýndın logıstıkalyq ortalyǵynan shyqqan. Ol Qazaqstan aýmaǵy arqyly ótip, Aqtaý portyna jetedi, odan júk parommen Ázerbaıjanǵa jetkiziledi.
Dástúrli ádispen salystyrǵanda, bul transkaspıılik tasymaldaý ýaqytyn aıtarlyqtaı qysqartýǵa múmkindik beredi.
Bolashaqta jergilikti óndirilgen fotoelektrli modýlder Kavkaz, Túrkııa jáne Shyǵys Eýropa elderine yńǵaılyraq jetkiziletin bolady.
Qazirgi ýaqytta Huayuan halyqaralyq qurlyq porty Shansı provıntsııasyn 16 eldiń 48 qalasymen baılanystyratyn 23 Qytaı-Eýropa jáne Qytaı-Ortalyq Azııa baǵyttary boıynsha turaqty temirjol tasymaldaýlaryn júzege asyrady.
Aıta keteıik, sońǵy 5 jylda Transkaspıı halyqaralyq transport baǵyty boıynsha tasymaldanatyn júk 6 esege ósken.