Qazaqstan altyn qory boıynsha TOP-20 eldiń qatarynda
ASTANA. KAZINFORM — Sońǵy 10 jylda elimizde altyn quramdy ken óndirý 2,2 ese artty. Bul týraly Ónerkásip jáne qurylys vıtse-mınıstri Iran Sharhan málim etti.
— Metaldar — jaı ǵana taýar emes, olar ekonomıkalyq jáne saıası kúshtiń quraly. Ǵalamdyq básekelestik kúsheıip jatqan jaǵdaıda Qazaqstan turaqtylyqty, beıtaraptyqty jáne boljamdylyqty saqtap keledi, — dedi Iran Sharhan elordada ótip jatqan 15-i halyqaralyq taý-ken metallýrgııa kongresinde.
Vıtse-mınıstr keltirgen málimetke súıensek, elimiz birneshe metall túri boıynsha álemdegi iri óndirýshilerdiń qatarynda.
— Búginde Qazaqstan kóptegen jyl boıy tıtan, mys, alıýmınıı, myrysh pen qorǵasyn, ferroqorytpalar, sondaı-aq berıllıı, tantal jáne nıobıı sııaqty metaldardy óndirý jáne jetkizý boıynsha álemdik naryqtaǵy negizgi oıynshylardyń biri. Sońǵy 10 jylda altyn quramdy ken óndirý 2,2 ese artty, soǵan sáıkes affınırlengen altyn óndirisi 2 ese ulǵaıdy. Bul Qazaqstannyń álemdegi altyn qoryna ıe TOP-20 eldiń qataryna kirýine múmkindik berdi, — deıdi ol.
Aıta keteıik, elordada halyqaralyq taý-ken metallýrgııa kongresi ótip jatyr. Oǵan álemniń 20 elinen 1300 delegat qatysyp jatyr.