Qazaqstan álemniń 70 eline astyq jóneltedi
Bul týraly búgin Ortalyq kommýnıkatsııalar qyzmetinde QR Aýyl sharýashylyǵy mınıstrliginiń damý kórsetkishterine arnalǵan baspasóz máslıhatynda QR Aýyl sharýashylyǵy mınıstrliginiń Strategııalyq josparlaý jáne taldaý departamenti dırektorynyń orynbasary Ásel Ramazanova málim etti.
«Jalpy alǵanda, aýyl sharýashylyǵynyń óndiris kólemi 2015 jyly 3,3 trln. teńgeni qurady. Bul 2001 jylmen salystyrǵanda 6 esege artyq. Álemniń 70-ten asa eline jyl saıyn 5-8 mln. tonna astyqty naryqqa shyǵaryp, Qazaqstan astyq óndirý boıynsha iri memleketke aınaldy. Jyl saıyn 2,5 mln. tonnaǵa deıin undy eksportqa shyǵaryp, sońǵy jyldary álem boıynsha kóshbasshy oryndardyń birin ıemdendik», - dedi Á. Ramazanova.
Sondaı-aq, ol aýyl sharýashylyǵy salasynda ár kezeńniń eresheligine qaraı sheshimder qabyldanyp otyratynyn, tıisinshe, qazirgi tańda álemdik tájirıbede oń nátıjeler kórsetip otyrǵan ámbebap tetikterdi iske qosý úshin agroónerkásiptik keshendi damytýdyń 2017-2021 jyldarǵa arnalǵan memlekettik baǵdarlamasynyń qabyldanǵaly otyrǵanyn jáne de onyń buǵan deıingi salalyq baǵdarlamalardyń zańdy jalǵasy ekendigin jetkizdi.
Onyń aıtýynsha, atalǵan memlekettik baǵdarlamanyń basty maqsaty - naryqqa qajetti básekege qabiletti AÓK ónimderiniń óndirisin qamtamasyz etý. Atap aıtqanda, ázirlenip jatqan memlekettik baǵdarlamanyń negizgi mindetteri mal sharýashylyǵynyń tıimdiligin 58%-ǵa, al ósimdik sharýashylyǵynyń tıimdiligin 40%-ǵa arttyrý, taýarly óndiriske 670 myń usaq óndirýshini tartý jáne ónimderdi ótkizý men óńdeýdiń pármendi júıesin qurý úshin aýqymdy aýyl sharýashylyǵy kooperatsııalaryn damytý, AShTÓ-ni barynsha qamtı otyryp, memlekettik qoldaýdyń tıimdiligin jáne qoljetimdiligin qamtamasyz etý, maqsatqa baǵyttalǵan eksporttyq saıasatty iske asyrý jáne organıkalyq ónimniń qazaqstandyq brendin jyljytý, 600 myń ga astam sýarmaly jerdi aınalymǵa tartý, AÓK-ni memlekettik retteýdi jetildirý syndy tarmaqtardy qamtıdy.
«Jalpy, ósimdik sharýashylyǵy salasynda aýyl sharýashylyǵy daqyldaryn ártaraptandyrý boıynsha jumys jalǵastyrylady. Aıtalyq, bıdaı alqaptarynyń bir bóligi asa suranysqa ıe daqyldarmen (maıly daqyldar, arpa, jemdik júgeri, qant qyzylshasy, azyqtyq daqyldar) almastyrylady. Aýyl sharýashylyǵy óniminiń ónimdiligin joǵarylatý maqsatynda joǵary sapaly tuqymdardy qoldaný jáne tyńaıtqyshtardy engizý úshin memlekettik qoldaý kórsetiledi. Mal sharýashylyǵy salasynda mal azyǵymen qamtamasyz etýdi jolǵa qoıý qajet. Osyǵan oraı, eldik azyqtyq teńgerim ázirlenip, engiziletin bolady, azyqtyq daqyldardyń alańdary ulǵaıtylady, qurama jemderdi óndirý jáne tutyný yntalandyrylady, sondaı-aq, jaıylymdardy paıdalanýdyń tıimdiligin joǵarylatý boıynsha jumys júrgiziledi. Sonymen qatar, memlekettik qoldaý kórsetý arqyly asyl tuqymdy janýarlardyń úlesin joǵarylatý boıynsha sharalar qabyldanady», - deıdi ol.
Sonymen qatar, AÓK sýbektileriniń tehnıkalyq jaraqtandyrylýyn arttyrý úshin alys shetelden qymbat tehnıka men jabdyqtardy satyp alý úlesin tómendetý boıynsha sharalar qabyldanady jáne de agroónerkásiptik keshendi memlekettik retteýdi jetildirý sheńberinde ǵylym men óndiris arasyndaǵy baılanysty qamtamasyz etý boıynsha is-sharalar iske asyrylatyn bolady.
Aıta keteıik, aǵymdaǵy jylǵy 9 qyrkúıekte Úkimettiń keńeıtilgen otyrysynda Memleket basshysy Úkimetke jyldyń sońyna deıin Sý resýrstaryn basqarýdyń memlekettik baǵdarlamasymen biriktirý arqyly Agroónerkásiptik keshendi damytýdyń memlekettik baǵdarlamasyn ázirleýdi tapsyrǵan bolatyn. Búgingi tańda atalǵan tapsyrmany oryndaý aıasynda baǵdarlama jobasyn qoǵamdyq talqylaýdan ótkizý, sarapshy qaýymdastyqtan usynystar jınaý jumystary júrgizilýde.