Qazaqstan álemdik energetıkada mańyzdy rólin saqtap keledi — Shell kontserniniń ókili

ASTANA. KAZINFORM — Qazaqstan jahandyq naryqtyń negizgi qatysýshylarynyń biri bolyp qala otyryp, álemdik energetıkada eleýli ról atqarýdy jalǵastyryp otyr. Bul týraly elordadaǵy «QAZMUNAIGAZSERVIS-2026» konferentsııasynda Qazaqstandaǵy Shell kontserniniń tóraǵasy Sıýzann Kýgan málim etti. 

Onyń aıtýynsha, Qazaqstan jahandyq energetıkalyq júıede mańyzdylyǵyn saqtap keledi jáne energııa resýrstaryn jetkizýdiń turaqtylyǵyn qamtamasyz etip otyr

— Qazaqstan álemdik energetıkanyń mańyzdy elementi ekeni anyq. Bul tek resýrstar máselesi ǵana emes, ıaǵnı Qazaqstan salada qoıylǵan mindetterdi ońtaıly júzege asyryp keledi. Qazaqstanda resýrstar ǵana emes, sonymen qatar kúshti kadrlyq áleýet pen kóptegen ósý núktesi bar ekenin atap ótkim keledi. Men úshin jumys barysynda bul jerde damý múmkindikteri áldeqaıda keń ekeni belgili boldy. Bul jalpy salaǵa da, jeke jobalarǵa da qatysty, — dedi Sıýzann Kýgan.

Onyń sózine qaraǵanda, Qazaqstanda óte kúrdeli tehnologııalyq jaǵdaılar jıi kezdesedi.

Alaıda, yntymaqtastyq pen halyqaralyq tehnologııalarǵa súıene otyryp, kóptegen jobalar joǵary deńgeıde júzege asyrylyp keledi. Bul jumys istep turǵan ken oryndaryna da, jańa bastamalarǵa da qatysty.

Kompanııanyń basymdyqtarynyń qatarynda jergilikti qamtýdy damytý jáne qazaqstandyq mamandardy tartý eskerilgen.

— Búginde Qazaqstanda bizdiń kompanııa qyzmetkerleriniń 95-96 paıyzyn jergilikti mamandar qurap otyr. Osy rette sheteldik qyzmetkerler sany az ǵana. Bul óz kezeginde jergilikti qamtýdy damytýǵa jáne ulttyq kadrlardy qoldaýǵa degen kózqarasymyzdy aıqyn kórsetip otyr, — deıdi Sıýzann Kýgan.

Buǵan deıin habarlanǵandaı, «QAZMUNAIGAZSERVIS-2026» konferentsııasynda Energetıka vıtse-mınıstri Erlan Aqbarov iri ken oryndaryndaǵy otandyq taýar óndirýshilerdiń úlesin keńeıtýge qatysty túsinik berdi.