Qazaqstan aldaǵy 3 jylda ýran óndirýdiń shartty kólemin 20 paıyzǵa kemitedi
«Qazaqstanda óndirilgen ýrannyń 100 paıyzy eksportqa shyǵarylady. Elimizde ony qoldanbaımyz. Jalpy biz dúnıejúzilik ýran óndirisiniń 40 paıyzyn qamtamasyz etip otyrmyz. Onyń jartysy Qazatomónerkásip kompanııasynyń enshisinde, qalǵany transulttyq seriktesterimizge tıesili. 2016 jyly Qazaqstanda 24600 tonna ýran óndirildi. Qajet bolsa biz munan da kóp óndire alamyz. Alaıda, qazirgi tańda naryqta suranystan ýran ónimi áldeqaıda kóp. Sondyqtan ýran óndirisin arttyrýǵa áli erte dep boljaýdamyz», - dedi ol.
Onyń aıtýynsha, naryqtaǵy ýran ónimniń suranystan kóptigi 1 fýnt ýrannyń baǵasyn 136 dollardan 18 dollarǵa deıin tómendetip jibergen. «Ýran óndirisiniń uzaqmerzimdi turaqtylyǵyn qamtamasyz etý úshin biz óndiris aýqymyn suranysqa ıkemdep, qysqartý jónindegi strategııalyq sheshim qabyldadyq. Aıta keterligi, 2018 jyldyń qańtar aıynan bastap 3 jylǵa jer qoınaýyn paıdalaný kelisimsharttary boıynsha josparlanǵan óndiris aýqymyn 20 paıyzǵa azaıtý kózdelip otyr. Bul shara kompanııanyń tutynýshylar aldyndaǵy mindettemelerine áser etpeıtindigin atap ótkim keledi», - dedi Ǵalymjan Pirimbetov.
