Qazaqstan Gaza sektoryndaǵy ahýaldy turaqtandyryp, qalpyna keltirý jumystaryna atsalysýǵa daıyn
VAShINGTON. KAZINFORM — Prezıdent elimiz Gaza sektoryndaǵy ahýaldy turaqtandyryp, aımaqty qalpyna keltirý jumystaryna atsalysýǵa daıyn ekenin jetkizdi, dep habarlaıdy Aqordanyń baspasóz qyzmeti.
Onyń sózinshe, Qazaqstan iskerlik jáne kásibı bedeli joǵary deńgeıdegi halyqaralyq kompanııalardy tarta otyryp, aımaqty qaıta qalpyna keltirý jáne qurylys jumystaryna qatysýǵa nıetti.
— Bul baǵdarlama boıynsha ınfraqurylym jasaqtaýǵa, úıler men turǵyn úı keshenderin, mektepter, aýrýhanalar jáne basqa da mańyzdy áleýmettik nysandardy salýǵa bolady. Álemdegi eń iri bıdaı óndirýshilerdiń biri sanalatyn elimiz Gaza men odan tysqary jerlerdegi azyq-túlik qaýipsizdigin qamtamasyz etý úshin gýmanıtarlyq kómek kórsetýge daıyn. Qazaqstan palestınalyq stýdentterdiń ýnıversıtetterimizde bilim alýy úshin bes jyl boıy 500-den asa oqý grantyn bólýdi josparlap otyr. Biz halyqaralyq deńgeıde moıyndalǵan elektrondyq úkimet salasyndaǵy tájirıbemizben jáne basqa da tsıfrlyq sheshimdermen bólise alamyz. Qazaqstan Halyqaralyq turaqtandyrý kúshterin qoldaýǵa ázir. ıAǵnı dalalyq gospıtal qurý úshin bir top medıtsına mamanyn, sondaı-aq Azamattyq-áskerı úılestirý ortalyǵyna baqylaýshylar jiberýge daıar, — dedi Qasym-Jomart Toqaev.
Eske salsaq, Prezıdent Beıbitshilik keńesiniń alǵashqy otyrysyna qatysyp jatyr.
Budan buryn Memleket basshysy Beıbitshilik keńesi kópjaqty kúsh-jigerdiń áleýetin arttyratyn, zaman talabyna saı uıym ekenin aıtqan edi.