Qazaqstan 4 eldi qosatyn gaz qubyry jobasyna qatyspaq

ALMATY. KAZINFORM – Bizdiń el Túrikmenstan, Aýǵanstan, Pákistan jáne Úndistandy qosatyn TAPÚ gaz qubyry jobasyna qatysýǵa nıetti. Bul týraly bıznes forýmynda QR Energetıka vıtse-mınıstri Erlan Aqkenjenov málimdedi.

Aıtýynsha, qazir Túrkimenstanmen kelissózder júrgizilip jatyr.

«Eger qazaqstandyq kompanııa bul jobaǵa sátti kirisetin bolsa, bul bizdiń elderimizdiń gaz salasyndaǵy yntymaqtastyǵyna jańa perspektıvalar ashady. Sonymen qatar, Qazaqstanda jasyl ekonomıkaǵa kóshý tujyrymdamasy qabyldandy, oǵan sáıkes elektr energııasyn óndirýdegi jańartylatyn energııa kózderiniń úlesi 2030 jylǵa qaraı 15%-ǵa, 2050 jylǵa qaraı 50%-ǵa (balamaly energııa kózderin qosa alǵanda) jetedi. Al, 2060 jylǵa qaraı kómirtegi beıtaraptyǵyna qol jetkizemiz»,- dedi ol.

Qazir Qazaqstanda jańartylatyn energııa kózderiniń 139 nysany jumys isteıdi.

«Mınıstrlik 5 jyldyq merzimge jańartylatyn energııa kózderi jobalaryn tańdaý boıynsha aýktsıondar kestesin ázirlegen. Aýktsıonǵa shyǵarylǵan qýattylyqtyń jalpy kólemi 2027 jylǵa deıin 6,7 GVt-tan astam boldy.

Biz Aýǵanstannan kelgen áriptesterimizben jańartylatyn energııa kózderi boıynsha aýktsıondar ótkizýdegi tájirıbemizben bólisýge daıynbyz»,- dep atap ótti Erlan Aqkenjenov.

Osyǵan deıin Qazaqstan men Aýǵanstan arasyndaǵy saýda aınalym 330,7 mln dollarǵa jetkeni týraly jazǵan edik. 

Sondaı-aq Aýyl sharýashylyǵy vıtse-mınıstri Erbol Tasjúrekov Qazaqstan men Aýǵanstan aýyl sharýashylyq taýar aınalymyn 1 mlrd dollarǵa deıin arttyratynyn aıtqan bolatyn. 

Budan bólek, Qazaqstan Aýǵanstanǵa otandyq avtokólikterdi jetkizýdi josparlap otyr.