Qazaqstan 3 aıda 17,2 mlrd tekshe metr gaz óndirgen

ASTANA. KAZINFORM — Energetıka mınıstri Erlan Aqkenjenov Úkimet otyrysynda eldegi gaz óndirisiniń ahýalyn baıandady.

— 2024 jyldyń qorytyndysy boıynsha gaz óndirý 59 mlrd tekshe metrge jetken. 2025 jylǵa arnalǵan óndirý jospary — 62,8 mlrd tekshe metr. 2025 jyldyń I toqsanynda gaz óndirý 17,2 mlrd tekshe metr boldy, — dedi mınıstr.

Onyń aıtýyna qaraǵanda gaz óndirýdiń negizgi ósimin Qarashyǵanaq, Teńiz jáne Qashaǵan sııaqty iri ken oryndary esebinen qamtamasyz etý josparlanyp otyr.

— 2024 jyly taýarlyq gaz óndirý kólemi 28,7 mlrd tekshe metr boldy. 2025 jylǵa arnalǵan óndiris jospary — 29,4 mlrd tekshe metr. 2025 jyldyń I toqsanynda 7,3 mlrd tekshe metr óndirildi. 2024 jyly ishki naryqtyń qajettilikterine 21,2 mlrd tekshe metr gaz jetkizildi. 2025 jylǵa arnalǵan boljamdy tutyný kólemi shamamen 21,3 mlrd tekshe metr bolmaq. 2024 jyly suıytylǵan munaı gazyn óndirý kólemi 1,7 mln tonnaǵa jetti. 2025 jylǵa arnalǵan jospar — 1,7 mln tonna, — dedi ol.

Eske salsaq, Prezıdent Qasym-Jomart Toqaev Jańaózen gaz óńdeý zaýyty qurylysynyń keshigýin Úkimettiń óreskel olqylyǵy retinde baǵalaǵan edi.