Qazaqstan 2060 jylǵa deıin kómirtegi beıtaraptyǵyn kózdeıdi
ASTANA. KAZINFORM — Klımattyń ózgerýi ekologııalyq jáne áleýmettik-ekonomıkalyq aspektilerge áser etip, turaqty damýǵa úlken qaýip tóndiredi, dep habarlaıdy Ekologııa jáne tabıǵı resýrstar mınıstrliginiń baspasóz qyzmeti.
Vedomstvo málim etkendeı, elimiz georgrafııalyq ornalasýyna baılanysty klımattyq ózgeristerge beıim. Máseleniń kúrdeliligin túsinip, halyqaralyq qaýymdastyq oǵan qarsy sharalardy kúsheıtýdi belsendi túrde qoldaıdy, bul kóptegen halyqaralyq qujat pen qararlarda kórsetilgen.
— Qazaqstan barlyq negizgi halyqaralyq Klımattyq kelisimderdiń qatysýshysy bola otyryp, parnıktik gazdar shyǵaryndylaryn azaıtýǵa jáne óz ekonomıkasyn ózgermeli klımattyq jaǵdaılarǵa beıimdeýge umtylady. Bul rette el ekonomıkasyn jahandyq klımattyq trendterge beıimdeý, jasyl ınvestıtsııalardy qoldaý jáne energııa tıimdiligin qamtıtyn, Kómirtegi beıtaraptyǵyna qol jetkizýdiń 2060 jylǵa deıingi strategııasyn bekitý mańyzdy qadam sanalady. Klımattyq maqsattardy iske asyrý úshin Qazaqstan Halyqaralyq qoldaý shartymen 1990 jylǵy deńgeıden 2030 jylǵa qaraı shyǵaryndylardy shartsyz túrde 15% jáne shartty 25%-ǵa tómendetý jónindegi maqsattarmen BUU-na óziniń Ulttyq deńgeıde aıqyndalatyn úlesterin (UDAÚ) usyndy, — delingen mınıstrlik taratqan aqparatta.
Qazaqstan jasyl tehnologııalardy qoldaý úshin ınfraqurylymdy belsendi damytyp keledi jáne lastanýdy azaıtý úshin eń úzdik qoljetimdi tehnologııalardy (EQT) engize otyryp, ınvestıtsııalar tartady, bul kásiporyndardyń ekonomıkalyq tıimdiligin arttyrýǵa yqpal etedi.
Qazaqstanda dekarbonızatsııanyń mańyzdy aspektisi geotermaldyq, jel jáne kún energııasy, sondaı-aq «jasyl» sýtegi sııaqty jańartylatyn energııa kózderin paıdalaný bolyp esepteledi.
2026 jyly Óńirlik ekologııalyq sammıtti ótkizý jónindegi bastama Ortalyq Azııadaǵy kúsh-jigerdi shoǵyrlandyrýǵa yqpal etedi.
2026 jylǵy 22–24 sáýir aralyǵynda Astana qalasynda ótetin Sammıttiń segiz negizgi baǵytyna klımattyq aýysýdy qoldaý, ekologııalyq jáne tabıǵı táýekelderge beıimdelý jáne ekonomıkalyq ornyqtylyq, óńirdiń azyq-túlik qaýipsizdigi men ekojúıeleri, tabıǵı resýrstardy ornyqty basqarý, atmosferalyq aýanyń lastanýymen kúres jáne qaldyqtardy basqarý, ekologııalyq maqsattarǵa qol jetkizý tetikteri, ádiletti jáne ınklıýzıvti aýysý, sondaı-aq ekologııalyq jáne tsıfrlyq quzyretter kiredi. Sammıt aldyndaǵy konsýltatsııalar óńir úshin naqty sheshimderdi ázirleýge múmkindik beredi.
Budan buryn bıyl Ortalyq Azııa elderiniń Óńirlik ekologııalyq sammıti ótetinin jazǵanbyz. Nátıjesi boıynsha memleket basshylarynyń deklaratsııasy men 2026–2030 jyldarǵa arnalǵan is-qımyl baǵdarlamasyn qabyldaý josparlanyp otyr.