Qazaqsha kontent sapasyn aǵylshyn tiliniń bazasynda kóterý kerek - Ýıkıpedııa ákimshisi
Shveıtsarııadaǵy qazaqtardyń basyn qosyp, BIRLIK qazaq-shveıtsar qaýymdastyǵyn qurýǵa atsalysqan qandasymyz Rýslan Toqbolatty kópshilik qazaq Ýıkıpedııasynyń ákimshisi retinde kóbirek tanıdy. 2013 jyly ol atalmysh resýrsqa ákimshi bolyp turǵanda qazaq tilindegi ǵylymı maqalalardyń sany 200 myńnan asqan bolatyn. Qazir sol qarqyn nege toqtap qalǵanyn suraý úshin Shveıtsarııadaǵy qandasymyzǵa habarlasyp kórdik.
«Ýıkıpedııa degen eriktilerdiń jumysy ǵoı. Qoldanýshylar óz erkimen, qabiletiniń jetkeninshe maqalalardy óńdeıdi. Qazaqstandyqtardyń kóbi orys, aǵylshyn tilin bilgendikten, olarǵa sol tilderde aqparat alý ońaıyraq bolǵandyqtan qazaq Ýıkıpedııasy ondaı qatty damymaı jatqan shyǵar. Óıtkeni, aqparttardyń barlyǵyn basqa tilderde tabýǵa bolady. Al qazaqsha Ýıkıpedııaǵa atsalysýshylar patrıottyq sezimniń jetegimen qolynan kelgen úlesin qosyp júr», - deıdi qandasymyz.
Degenmen, bul iske eriktilerdiń mindeti retinde beıjaı qaramaı, paıdaly jumys tyndyryp júrgenderge qolpashtaý kórsetken artyq bolmas degen oı aıtty.
«Ýıkıpedııa eriktilerdiń jobasy desek te, eńbek ónimdi bolý úshin adamdy qoldap, qolpashtap turý kerek. Sosyn qatysýshylardyń ishinde aýyzbirlik bolýy kerek. Adamdar kóbinese bir-birin tanı qoımaıdy. Tek syrttaı bir-biriniń jumysyn kórip, bilip otyrady. Arasynda tyǵyz aralasatyndar da bar. Biraq sırek. Maqalalardyń sany óspeı turýyna osy birliktiń joqtyǵy sebep shyǵar. Ortaq bir uıym bolsa, osy iske qyzyǵýshylardyń basyn qossa, kem degende jylyna bir ret jınap, negizgi problemalardy talqylap, josparly túrdi is-sharalar jasaıtyn bolsa, múmkin belsendilik artatyn shyǵar. Óz basym Ýıkıpedııaǵa kirmegeli kóp boldy. Óıtkeni jumys babymen basqa da qoǵamdyq jumystardan ýaqyt artylmaı jatyr. Sondyqtan da qazir, ókinishke qaraı, burynǵydaı kóp kóńil bólýge qol tımeı júr» - degen Rýslan Toqbolat qazaq tildi ortanyń bilimin kóterý úshin eki araǵa orys tilin deldal qylý ádetinen arylýymyz kerek dep otyr.
«Internettegi kontent sapasy tek qazaq tiliniń ǵana problemasy emes. Mysaly, nemis tildi aımaqtarda da bilim qazir kóbinese aǵylshyn tilinde alynady. Óıtkeni kóptegen jańalyqtardy, álemdik zertteý nátıjelerin aǵylshynsha tabý ońaı. Adamdardyń kóbi aǵylshynsha bilgendikten sol tilde aqparatty ala salady. Kásibı deńgeıde de aqparat kóbinese aǵylshyn tilde alynyp jatyr. Ǵalamdyq tendentsııa soǵan qaraı bet alýda. Meniń oıymsha, jahandaný máselesi qazaq tiline ǵana emes, basqa da tilderge áserin tıgizip jatyr. Odan qatty qorqýdyń qajeti joq. Degenmen de aǵylshyn tiline kóp kóńil bólgen jón. Óıtkeni bul tilde bilim týyndaıdy, bilim qory jınalady, jyldan-jylǵa bazasy nyǵaıyp jatyr. ıAǵnı, aǵylshyn tiline kóbirek kóńil bólgen jón. Al qazaq tiliniń ınternettegi jaǵdaıy aqyryndap damıtyny anyq. Oǵan qajettilik bolǵan kezde usynys ta bolady. Qazaq tilinde qyzyqty kontentter kóbeıse, damý múmkindigi bar. Bir eskeretin jaıt, jahandyq úlken protsestermen arpalysýdyń qajeti joq dep oılaımyn. Óıtkeni bul zańdy, tabıǵı protsess. Kerisinshe, qasaryspaı, aǵylshyn tiline orta asha otyryp, qazaqsha kontentti sonyń bazasynda damytqan durys dep oılaımyn», - dedi BIRLIK qazaq-shveıtsar qaýymdastyǵynyń teń tóraǵasy.
