QazAqparat tilshisi Elbasynyń Alǵys hatymen marapattaldy
Marapat alǵan eriktiler arasynda QazAqparat tilshisi Aıjan Serikjanqyzy da bar.
«Elbasy Nursultan Nazarbaevtyń bastamasymen qurylǵan «Birgemiz» qorynyń jelisimen jáne metsenattardyń qoldaýymen TJ kezeńinde asa muqtaj otbasylarǵa járdem kórsetildi. Osynaý jumystardy atqarýda volonterlarymyzdyń róli zor boldy. Respýblıka boıynsha eriktiler 250 myńnan astam otbasyǵa azyq-túlik sebetterin, maskalar men eń qajetti zattardy jetkizdi. Sonymen qatar, jasotandyqtar Maqtaaral aýdanyna attanyp, tasqyn sýdan zardap shekken aýyl turǵyndaryna kómek kórsetip jatyr. Bul jumys arqyly sizder óz otanshyldyqtaryńyzdy, azamattyq pozıtsııa men janashyrlyqtaryńyzdy tanyta otyryp, jastarǵa úlgi kórsettińizder», - dedi «Jas Otan» jastar qanatynyń jetekshisi Elnur Beısenbaev marapattaý saltanatynda.
Onyń aıtýynsha, tótenshe jaǵdaı kezinde elimizde bes myńǵa jýyq erikti tynymsyz eńbek etti. Onyń arasynan eń belsendi jumys istegen 3 myń qazaqstandyq Elbasy alǵys hatymen marapattalmaq.
«Apta boıy respýlıkanyń barlyq aımaqtarynda ákimder Elbasy Alǵys hatyn tabystaıtyn bolady. Nur-Sultan qalasyndaǵy saltanatty sharany Nur Otan partııasy Tóraǵasynyń birinshi orynbasary Baýyrjan Baıbek bastady, ol eń belsendi jas volonterlerdi marapattady. Ekinshi kúni «Biz Birgemiz» aktsııasyna kómektesken tanymal tulǵalar marapat aldy. Muny da túsiný qajet, ánshiler, shoý-bıznes ókilderi bizdiń qatarymyzda kóp júrmese de, bizge aqparattyq qoldaý kórsetti. Metsenattardy tabýǵa, atqarǵan jumystarymyzdy áleýmettik jelide jarııalaýǵa, jurtshylyqty qaıyrymdylyqqa shaqyrýǵa qol ushyn berdi. Endi búgin úshinshi lekte – tikeleı Nur-Sultan qalasynda aktsııamyzǵa aqparattyq qoldaý kórsetkender, avtovolonterler, erikti úılestirýshileri, qaıyrymdylyq qorlary men jeke kompanııalardyń ókilderi shaqyryldy. Jalpy Nur-Sultan qalasynda marapatqa laıyq bolǵan 600-ge jýyq volonter bar. Karantın bolǵandyqtan, olardy 30 adamnan toptastyryp, bólek-bólek shaqyryp jatyrmyz», - dedi E. Beısenbaev.
Eske sala ketsek, «Nur Otan» partııasynyń kóshbasshysy Nursultan Nazarbaev qazaqstandyq volonterǵa óz yqylasyn bildirip, alǵys hattarǵa qol qoıǵan edi.
Foto: jasotan.kz
