«Qazaqmys» ýaqytsha jumysyn toqtatady

ASTANA. KAZINFORM – «Qazaqmys» kompanııalar Tobynyń óndiristik nysandarynda jazataıym oqıǵalardyń jıileýine baılanysty korporatsııa basshylyǵy búginnen bastap bekitilgen kestege sáıkes táýekel deńgeıi joǵary barlyq tehnologııalyq protsesterdi toqtata turý týraly sheshim qabyldady.

«Qazaqmys» kompanııalar Toby qaýip tónýi yqtımal telimderde óndirýdi ýaqytsha toqtatady jáne barlyq jerde qaýipsizdik sharalaryn kúsheıtedi.

Kenish toqtap turǵan kezeńde qaýipsizdik erejeleriniń saqtalýy baqylaýǵa alynyp, barlyq jumys túrleri jan-jaqty tekseriledi. Barlyq kemshilik joıylǵannan keıin ǵana telimderdegi jumys qaıta jalǵasady.

Qaýipsizdikti kúsheıtý jónindegi keshendi sharalar sheńberinde Qazaqmys kompanııanyń barlyq óndiristik nysandaryn jospardan tys tekseredi, sondaı-aq ınjenerlik-tehnıkalyq personal men jerasty jumys oryndaryn qaıta attestattaýdan ótkizedi. Sonymen qatar komıssııa qutqarý jabdyqtarynyń daıarlyǵyn, qyzmetkerlerdiń ónerkásiptik qaýipsizdik tehnıkasy men tótenshe jaǵdaıdaǵy is-qımyl algorıtmderi boıynsha bilimin tekseredi.

Bul qadam kompanııanyń basty basymdyǵy – qyzmetkerlerdiń densaýlyǵy men ómirin qorǵaýǵa baǵyttalǵan.

Budan bólek kompanııanyń barlyq óndiristik alańdarynda oryn alýy yqtımal apattyq jaǵdaıda personaldyń is-áreketin pysyqtaýǵa jáne tótenshe jaǵdaıǵa daıyndyǵyn jetildirýge baǵyttalǵan jospardan tys jattyǵýlar ótkizilýde.

«Qazaqmys» kompanııalar Toby óz qyzmetkerleri men olardyń otbasy aldyndaǵy jaýapkershiligin tolyǵymen túsinedi. Biz jumys oryndaryndaǵy apattyń aldyn alý jáne qaýipsiz eńbek jaǵdaıyn qamtamasyz etý úshin barlyq kúsh-jigerimizdi jumsaımyz.

Eske sala keteıik, buǵan deıin Qazaqmysta taǵy bir kenshi qaza tapqanyn jazǵan bolatynbyz.