Kazakhmys Holding jas energetıkterge turǵyn úı salady
ASTANA. KAZINFORM — Kazakhmys Holding otyn-energetıkalyq kesheniniń (OEK) jas mamandaryn qoldaýǵa baǵyttalǵan jańa bastamany qolǵa aldy.
2025 jyly «Kazakhmys Holding» JShS OEK basqarý jónindegi dırektory Vladımır Jumanbaev Qaraǵandy oblysynyń Topar kentinde «Komfort+» sanatynda bes qabatty, 80 páterli turǵyn úı salý týraly sheshim qabyldady. 2026-2027 jyldary turǵyn úımen qamtamasyz etý baǵdarlamasy keńeıtilip, Balqash jáne Jezqazǵan qalalaryn qamtıdy. Bul úıler Balqash, Jezqazǵan jylý elektr ortalyqtarynyń, sondaı-aq «Topar BETS» JShS qyzmetkerlerine arnalady.
«Kazakhmys Energy» JShS bas dırektory Temirlan Ótegenov joba Kazakhmys Holding Dırektorlar keńesiniń tóraǵasy Edýard Ogaıdyń qoldaýymen júzege asyrylyp jatqanyn atap ótti.
— Biz jumys isteýge jáne ómir súrýge qolaıly jaǵdaı jasaý daryndy jastardyń osy salaǵa bet burýyna, taban aýdarmaı eńbek etýine, sondaı-aq jumysshy mamandyqtarynyń bedelin arttyrýǵa múmkindik beretinine senimdimiz, — dedi Temirlan Ótegenov.
Bul bastama Memleket basshysy belgilegen baǵytqa sáıkes keledi: Qazaqstan Prezıdenti óziniń Joldaýynda 2025 jyldy jumysshy mamandyqtar jyly dep jarııalap, bilikti kadrlardyń el ekonomıkasyna qosatyn úlesi men eńbekke degen qurmetti qalyptastyrýdaǵy mańyzdylyǵyn atap ótti.
Qazaqmys kompanııasy bilim berý jobalaryn da belsendi damytyp keledi. 2024 jyly kompanııa energetıka jáne taý-ken óndirisi salalaryna maman daıarlaýǵa baǵyttalǵan «Mıras» baǵdarlamasyn iske qosty. Bul baǵdarlama kompanııa esebinen joǵary bilim alýdy jáne OEK kásiporyndaryna jumysqa turýdy kózdeıdi.
Kompanııada oqytýdy, áleýmettik qoldaýdy jáne turǵyn úımen qamtamasyz etýdi qamtıtyn keshendi tásil kadr jetispeýshiligi máselesin sheshýge jáne Qazaqstannyń otyn-energetıkalyq keshenin damytýǵa úles qosýǵa daıyn mamandardyń jańa býynyn qalyptastyrýǵa kómektesedi dep sanaıdy.