«Qazaqfılm» kıno túsirýge 14,6 mlrd teńge jumsap, 695 mln teńge paıda tapqan
ALMATY. KAZINFORM - «Qazaqfılm» ulttyq kınostýdııasy túsirgen fılmder óz bıýdjetin aqtamaıdy. Kompanııa búginde 95% shyǵynǵa batyp otyr. Quıylǵan qarjynyń qaıtarymy 5 paıyzǵa da jetpeıdi. Bul týraly Jibek Joly telearnasynyń tilshisi habarlady.
Másele joǵary aýdıtorlyq palatanyń tekserisi barysynda anyqtaldy. Kommertsııalyq turǵydan sátti jobalardyń joqtyǵy, kassanyń azdyǵy jáne fılm óndirisiniń shekten tys shyǵyny úshin stýdııa talaı jyl synǵa ushyrap keledi. Aty ańyzǵa aınalǵan elimizdiń basty kınostýdııasy qazir shtattyq rejımde jumys istep tur. Tek burynǵy tabystyń ornyn qaryz ben sheshilmeı kele jatqan túıtkilder basqan.
«Fılmderdiń 90%-yn jeke prodakshndar men kompanııalar túsiredi. Nelikten qazir mundaı kassalyq tapshylyq paıda boldy. Bul kınostýdııanyń bıýdjetke qarap qalǵanynyń nátıjesi. ıAǵnı, bıýdjet bar bolsa jumys isteıdi. Bıýdjet joq kezde jumys istemeıdi. Bul kınostýdııaǵa qatty áser etedi, óıtkeni kınostýdııa kezinde jylyna 40 fılmge deıin túsirgen», — dedi Sh. Aımanov atyndaǵy «Qazaqfılm» ulttyq kınostýdııasy aq prezıdentiniń m.a Aıdar Omarov.
«Qazaqfılm» qoldaý kórsetken 17 kartınaǵa jalpy 14,6 mlrd teńge bólindi. Odan 695 mln teńge kóleminde qarjy tústi. Osylaısha ortasha ekonomıkalyq tabys — 4,8% deńgeıinde qalyp otyr.
«2023 jyldyń qorytyndysy boıynsha bereshek somasy 650 mln teńgeni qurady. Al, 2022 jyldyń qorytyndysy boıynsha kompanııanyń shyǵyny 2021 jylmen salystyrǵanda 4,7 ese ósti. Shyǵyn kólemi 800 mlrd teńgeden asty. Bul jerde basqarý menedjmenti qalaı júzege asyrylýda degen suraq týyndaıdy», — deıdi QR Joǵary aýdıtorlyq palatasynyń múshesi Nurlan Nurjanov.
2019 jyldan beri elimizdegi kıno túsirý quzyreti zańdy túrde Ulttyq kınony qoldaý ortalyǵyna berilgen. Buryn kınostýdııa tikeleı memlekettik tapsyryspen jumys istegen bolsa, qazirgi tańda qandaı da bir fılm túsirý úshin tenderge qatysýy tıis. Al sala synshylary fılmniń sátti shyǵýy úshin óndirisin retke keltirý qajet ekenin aıtady. Áıtpese, kınoteatrlar sapasyz ónimdi almaıdy. Sodan memlekettik tapsyryspen túsirilgen fılmder kóbine arhıvte shań basyp qalady.
«Qarjy bólgen kezde tek qana fılmderdiń túsirilimine ǵana emes, sonymen qatar onyń dıstrıbıýtsııasyna prokatyna jáne jarnamasyna aldyn ala oılanyp bóliný kerek dep esepteımin. Eger ondaı múmkindik bolmasa zań júzinde jekemenshik kınoteatrlardy osy memlekettik tapsyryspen túsirilgen fılmderdi kórsetýge mindetteý kerek. Bizdiń kórshi memleketter sııaqty memlekettiń ózine tıesili kınoteatrlar salynýy kerek. Sonda ǵana kınomyz halyqqa jetedi», — deıdi kınosynshy Dana Ámirbekova.
Mádenıet jáne aqparat mınıstrligi kınostýdııa jaǵdaıyn retteý úshin Kıno týraly Zańǵa ózgeris engizýdi josparlap otyr. Zań ózgerse, kınostýdııaǵa ınvestorlar tartylady.
