«Qazaqfılm» múgedek boıjetken týraly fılmniń treılerin jarııalady
QR Mádenıet jáne sport mınıstrliginiń tapsyrysy boıynsha túsirilgen bul fılmdi ̶ qos avtor Ázızjan Zaırov pen Muhamed Mamyrbekov usyndy. «Qyz ben teńiz» fılminiń negizi ómirden alynǵan. Bas keıipker bolǵan boıjetken - ARDI múmkindigi shekteýli balalary bar ata-analar assotsıatsııasynyń ońaltý ortalyǵynyń tárbıelenýshisi Dınara Sháripova. Aqjarqyn, eńbekqor, kómek qolyn árdaıym sozýǵa daıyn turatyn Dınara óte ójet adam. Onyń fılmdegi esimi Ásel. Onyń bar armany - mahabbatyn kezdestirip, otbasyn qurý jáne bala súıý.
«Fılmniń túsirilimderi Almaty qalasynda jáne Qapshaǵaı jaǵalaýynda ótken. Fılmge túskenderdiń barlyǵy derlik kásibı akterler emes, múmkindigi shekteýli adamdar (BTsP dıagnozy jáne psıhıkalyq damý kesheýildeýi bar). Al bas keıipkerdiń ápkesi róline teatr jáne kıno aktrısasy Gúlbahram Baıbosynova túsken», - dep habarlaıdy kınostýdnııanyń baspasóz qyzmetinen.
Fılmniń mazmuny shynaıy ómirden alynǵan. Óziniń jazylmaıtyn aýrýyna qaramastan, Ásel esimdi boıjetken otbasyn quryp, ana ataný úshin ómirdiń bar qıynshylyǵyna kónýge daıyn. «Arman alǵa jeteleıdi» demekshi, Ásel barlyq qıyndyqtarǵa tótep berip, jaqsylyqtan úmit úzbeıdi.
Fılmniń stsenarıı avtorlary Muhamed Mamyrbekov, Ázızjan Zaırov, qoıýshy operatory: Tımýr Itenov, qoıýshy sýretshi: Djal Ibragımov. Týyndynyń basty rólinde Dınara Sháripova, Tahır Ýmarov, Qanaǵat Tasqaraev, Gúlbahram Baıbosynova, Saýran Qasteev, Almat Ádilbaev jáne basqalary oınaıdy.
Eske sala ketsek, buǵan deıin «Qazaqfılm» «Qyz ben teńiz» atty tolyqmetrajdy kórkem fılmniń túsirilimderi aıaqtalǵanyn habarlaǵan bolatyn.
