Qazaq jýrnalıstıkasynyń qabyrǵasy kúırep tústi - Namazaly Omashev
Jıyn bir mınýt únsizdikpen bastaldy jáne onda qalamgerdiń ómiri men shyǵarmashylyǵy, qoǵamdaǵy róli áńgimelendi.
«Qazaq jýrnalıstıkasynyń qabyrǵasy kúırep tústi deýge bolady. Óıtkeni, qazaq jýrnalıstıkasynda Sherhandaı kóp júk kótergen, kóp shákirt tárbıelegen, jýrnalıstıkaǵa shyǵarmashylyq úles qosyp, bedelin aspanǵa kótergen adam az. Bul kisi jazsa da, sóılese de úlgi edi. Іsi men sózi birdeı, minezi men jazýy qabysqan adam. Bireýler jazýǵa sheber bolsa da, isi oraılaspaı jatady. Bireýler isker bolsa da, jazýy kelispeı jatady. Sherhan shyǵarmashylyǵy men adamı qasıeti birdeı adam boldy, sonysymen ózgelerge úlgi edi. Mundaı tulǵany joǵaltý - ult úshin orny tolmaıtyn úlken qaıǵy», - dedi belgili jýrnalıst, akademık Namazaly Omashev.
Onyń aıtýynsha, Sherhannyń ómirden ozýy qazaq jýrnalıstıkasyna ǵana emes, tutas halyqqa aýyr tıip otyr.
«Qazaq halqy óziniń asyl ulynan aıyryldy. Sheraǵańdy bilmeıtin qazaq kemde-kem. Shyǵarmashylyqta ǵana emes, óziniń adal minezimen, qaısarlyǵymen, tabandylyǵymen eldiń rýhyn kótergen, ultyn bıikke súıregen, Alash arystarynyń minez-qulqyn boıyna sińirip, basyn báıgege tikken qazaq ómirden ótti», - dedi akademık.
Sonymen birge, jýrnalıst keleshekte Sherhan shyǵarmashylyǵynyń kemeldene túsetinin jetkizdi.
«Sherhannyń máńgilik ǵumyry bastaldy. Taý sııaqty alystaǵan saıyn jazǵan dúnıeleri burynǵydan da kemeldenip, bıikteı túsetini anyq. Qazaq halqy, qazaq jýrnalıstıkasy, qazaq ádebıeti turǵanda, Sherhandar bıikteı beredi. Qabylan minez qaısar aǵamyzdyń topyraǵy torqa, jatqan jeri jaıly jánnat bolsyn», - dedi N. Omashev.
Eske sala ketsek, qalamger keshe shamamen 18:30-da Almaty qalasynda aýyr naýqastan qaıtys boldy.
Sherhan Muratazamen qoshtasý rásimi 11 qazan kúni saǵat 10.00-de M. Áýezov atyndaǵy Qazaq Memlekettik akademııalyq drama teatrynda ótedi. Jazýshy Keńsaı zıratyna jerlenedi.
Jazýshy qyrkúıek aıynda 86 jasqa tolǵan edi.
