Qazaq jazýshysy Qytaıdyń memlekettik syılyǵyn aldy

ASTANA. KAZINFORM – Qytaıdyń Úrimji qalasynda turatyn qytaıtildi qazaq jazýshysy Anar Zınýarbekqyzy Bın Sın atyndaǵy memlekettik ádebı syılyqtyń ıegeri atandy, dep habarlaıdy Kazinform tilshisi Tıanshan aqparattyq portalyna silteme jasap.

Portaldyń jazýynsha, sanven (esse) janryna arnalǵan ádebı syılyq jazýshyǵa «600 shaqyrym: sapar jolynda» atty tuńǵysh jınaǵy úshin «úzdik esse jınaǵy» nomınatsııasy boıynsha berilip otyr. Jınaqqa engen esselerinde avtor týǵan jerge saǵynysh, týysqandyq qarym-qatynas, dala sýreti, qazaqtyń ulttyq taǵamdary jáne qala ómiri jaıly jazady. Kórnekti qytaılyq jazýshy, synshy Lıý Lıanchen «Anardyń esseleri qazaqtyń án-kúıleri sekildi qońyr áýezdi jáne júrekke jyly, óne boıynan kók shalǵyn men aqsha bulttyń ıisi ańqyp turady» dep baǵalaǵan eken.

Ashyq derekkózden belgili bolǵandaı, Anar Zınýarbekqyzy Іle qazaq avtonomııalyq oblysynyń Kúnes aýdanynda ómirge kelgen. Kórkem shyǵarmashylyqpen 2014 jyldan beri aınalysyp keledi. Týyndylary «Batys», «Ulttar ádebıeti» sekildi bedeldi basylymdarda jaryq kórgen.

Mao Dýn jáne Lý Sın atyndaǵy ádebı syılyqtarmen qatar atalatyn Bın Sın ádebı syılyǵy Qytaıdyń kórkem ádebıet salasyndaǵy eń bedeldi syılyqtardyń biri. Ádebı syılyq 2002 jyldan bastap ár eki jyl saıyn berilip keledi. Bıyl baıqaýǵa 2023-2024 jyldary basylyp shyqqan 339 jınaq usynylǵan.