Qazaq tóbetine tán standarttar bıyl bekitiledi

ASTANA. KAZINFORM — Premer-mınıstr Oljas Bektenov Senat depýtatynyń saýalyna joldaǵan jaýabynda qazaq tóbetin saqtap, kóbeıtý jumystary qalaı júrip jatqanyn aıtty.

— 2025-2035 jyldarǵa arnalǵan Qazaqy ıt tuqymdaryn saqtaý jáne ósimin molaıtý jónindegi jol kartasy bekitildi, ol atalǵan ıt tuqymdaryn qorǵaýǵa, damytýǵa jáne tanymal etýge baǵyttalǵan. Sondaı-aq qazaqy ıt tuqymynyń tıisti standarttary qabyldandy, «Qazaq tazysy» taqyrybyna ǵylymı zertteýler júrgizildi. «Qazaq tóbeti» tuqymy boıynsha osyndaı jumys 2025 jyly aıaqtalady, — dep jazylǵan Úkimet jaýabynda.

Premer-mınıstr Japonııa men Túrkııada Kangal, Akıta, Shıba ıt tuqymdaryn eksporttaýǵa resmı tyıym salynǵany týraly málimetterdiń ras-ótirigi belgisiz ekenin aıtqan.

— Túrikmenstanda túrikmen alabaıynyń memlekettik deńgeıde qorǵalýyna jáne ony áketýge tyıym salynǵanyna qaramastan, alabaı FCI-de basqa ataýmen jáne ol elden tys basqa jerde tirkeldi. Mundaı jaǵdaıda tuqymnyń halyqaralyq deńgeıde sol ulttyń atymen tanylýy joqqa shyǵarylady. Osyǵan baılanysty qazaqy ıtterdiń tuqymyn halyqaralyq deńgeıde taný kezeńinde olardy eksporttaýǵa tyıym salý orynsyz dep esepteımiz, — delingen jaýapta.

Eske salsaq, ǵalymdar tóbet tuqymynyń tıbet mastıfterimen týystyǵy týraly keń taralǵan gıpotezany teriske shyǵarǵan bolatyn.