Qazaq tili modelin jasaýǵa 3 mlrd teńge bólinbek
ASTANA. KAZINFORM – Ǵylym jáne joǵary bilim mınıstrligi derbes til modelin ázirleý baǵytynda qandaı jumys júrgizilip jatqanyn aıtty.
«Qazaqstan Respýblıkasynyń Ǵylym jáne joǵary bilim mınıstrligi «Nazarbaev Ýnıversıteti» Aqyldy júıeler jáne jasandy ıntellekt ınstıtýtyn tolyqqandy zertteý ınstıtýtyna transformatsııalaý jónindegi tapsyrma aıasynda kelesini habarlaıdy. Mınıstrlik jasandy ıntellektini damytýǵa arnalǵan baǵdarlamalyq-nysanaly qarjylandyrýdy ǵylymı-zertteý ınstıtýttarynyń, joǵary jáne joǵary oqý ornynan keıingi bilim berý uıymdarynyń, sondaı-aq jasandy ıntellekt salasyndaǵy avtonomdy uıymdardyń qatysýymen («Sh.Shaıahmetov atyndaǵy «Til-Qazyna» Ulttyq ǵylymı-praktıkalyq ortalyǵy» KeAQ, «A.Baıtursynov atyndaǵy Til bilimi ınstıtýty», «Ál-Farabı atyndaǵy Nazarbaev Ýnıversıteti» KeAQ, «Instıtýt Aqparattyq jáne esepteý tehnologııalary» OMK ShJQ) konsortsıýmdar bazasynda júzege asyrýdy kózdep otyr», - dep atap ótti mınıstrlikten agenttiktiń resmı saýalyna oraı.
Vedomstvo málimetinshe, bıyl sáýirde Joǵary ǵylymı-tehnıkalyq komıssııada bıýdjettik baǵdarlamalar ákimshileriniń baǵdarlamalyq-nysanaly qarjylandyrylýy boıynsha 2024-2026 jyldarǵa arnalǵan ǵylymı-tehnıkalyq tapsyrmalaryna qatysty máseleleri qaraldy.
«Baǵdarlamalyq-nysanaly qarjylandyrý aıasynda «Qazaqstan Respýblıkasynda qazaq tilin memlekettik til jáne mádenıetaralyq qarym-qatynas tili retinde qoldaýǵa járdemdesetin qazirgi zamanǵy úlken tildik modeldi (LLM) qurý, tehnologııany damytý, derekterdiń qaýipsizdigin qamtamasyz etý, bilim berýdi damytý jáne ǵylymı zertteýlerdi jetildirý» baǵdarlamasy boıynsha konsortsıýmdar bazasynda konkýrs jarııalanady dep kútiledi. Osy konkýrsqa Nazarbaev Ýnıversıteti de qatysa alady. Atalǵan baǵdarlamany iske asyrý úshin 3 jylǵa 3 mlrd 92 mln teńge (2024 jylǵa - 1 mlrd 92 mln, 2025 jylǵa - 800 mln, 2026 jylǵa - 1 mlrd 200 mln teńge) kóleminde qarajat bólý josparlanyp otyr. Bólingen qarajat JI-ge jumsalady dep kózdelgen», - dedi mınıstrlikten.
Aıta keteıik, Prezıdent Qasym-Jomart Toqaev Ǵylym jáne tehnologııalar jónindegi ulttyq keńestiń otyrysynda qazaq tili modelin jasaý jumysy qolǵa alynǵanyn aıtqan bolatyn.
