Qazaq tilindegi «Kásipkerler sózdigi» jaryqqa shyqty
Qazaq tilindegi qajetti oqýlyq Ulttyq kásipkerler palatasynyń Pikirtalas klýbynyń búgingi otyrysynda tanystyryldy.
«Termınder kóp. Qazaq tilindegi balamasyn túsindirme retinde shyǵaryp otyrmyz. Máselen, aǵylshyn tilinde ekonomıkaǵa baılanysty sózder jetip artylady. Ony aýyl adamdarynyń biri túsinse, ekinshisi túsine bermeýi múmkin. Osyǵan baılanysty bel býyp, «Bıznes-bastaý» jobasy arqyly adamdardyń suranysyna baılanysty sózdik jasadyq. Bul - aýyldaǵy qarapaıym halyqtyń qoldanysyna saı keletin sózdik. Biz termınderdi kóbinese oqýlyqta túsindirýge tyrystyq», - dedi búgingi otyrysta «Atameken» UKP Basqarma Tóraǵasynyń orynbasary Eldar Jumaǵazıev.
«Kókjıek» baspasynan shyqqan sózdik negizinen kásipkerler qaýymynyń, sondaı-aq bıznes-áriptesterdiń, qarjy mekemeleri qyzmetkerleriniń, qarjy-bank salasyndaǵy keńesshilerdiń, basqa da múddeli mamandardyń kúndelikti iskerlik jáne qarjy-ekonomıkalyq kommýnıkatsııasynda paıdalanýǵa arnalǵan.
Sózdikte 500-ge jýyq kásipkerlikke qatysty termınder men resmı-isker mazmundy sózder toptastyrylǵan. Olardyń qazaq tilindegi túsindirmesi qamtylǵan. Sondaı-aq, jıi qoldanystaǵy tirkester keltirilip, olardyń orys tilindegi balamasy da kórsetilgen. Kásipkerlik saladaǵy kommýnıkatıvtik aktide qoldanylatyn kúrdeli ataýlar jáne olardyń qysqartylǵan nusqasy iriktelgen.