Qazaq saıttary bir-birine uqsap ketti - Aıdos Sarym
«Buryn BAQ-ty tórtinshi bılik dese, qazir «BAQ - besinshi, altynshy bılik» degen uǵym paıda boldy. Besinshi bılik - áleýmettik jeli bolsa, altynshy bılik - messendjer. Biz osynyń bárine beıimdele almaı jatqan sııaqtymyz», - deıdi Aıdos Sarym.
Ol qazaq baspasózi ózin-ózi shektep kele jatqanyn aıtty.
«Meniń oıymsha, qazaq baspasózi ózin-ózi shekteıdi, ekinshiden bılikke táýeldi, úshinshiden qoǵamdyq pikirge táýeldi. Biz tek laık jınaıtyn, ózektiligi joq máseleler týraly jazamyz. Dástúrli baspasóz (gazet - avt.) ınternetpen jarysa almaıtyndyqtan, tereń saraptamalyq maqalalar jazýy kerek», - deıdi ol.
Sondaı-aq, ol qazaqtildi saıttar bir-birine uqsap ketkenin aıtty.
«Qazir qazaq baspasóziniń ıisi de qalmaǵan sııaqty. Qazaq gazetteri de, saıttary da bir-birine uqsap ketti. Bizdiń baspasózde saıası reń paıda bolyp, ońshyl gazetter, solshyl gazetter, orta taptyń máselesin kóteretin gazet, saıttar paıda bolsa deımin. Qazaq kóbinese solshyl qoǵam, bizge qazir ońǵa burylys kerek. Qoǵam arasynda jańa ıdeıa, jańa pikirtalastarǵa jol ashý - óz qolymyzdaǵy nárse», - deıdi saıasattanýshy.
