«Qazaq radıosynda» Ánýarbek Baıjanbaev atyndaǵy stýdııa ashyldy

ALMATY. QazAqparat – Almatyda «Qazaq radıosy» ǵımaratynda qazaqtyń belgili dıktory Ánýarbek Baıjanbaev atyndaǵy stýdııa ashyldy. Bul týraly Aqparat jáne qoǵamdyq damý mınıstri Darhan Qydyráli Facebook-paraqshasynda jazdy, dep habarlaıdy QazAqparat tilshisi.

«Ulaǵatty is-shara qaıtalanbas daýys ıesiniń, radıo ardageriniń 100 jyldyǵyna oraı uıymdastyrylyp otyr.

«Qazaqtyń Levıtany» atanǵan Ánýarbek Baıjanbaev Qazaq radıosynda 50 jyldaı jumys istedi. Onyń sanaly ǵumyry osy qasıetti qara shańyraqta ótti. Ekinshi dúnıejúzilik soǵystyń aıaqtalǵanyn Keńes elderi Levıtannyń daýysymen estise, qazaq dalasyna jeńis habaryn Ánýarbek Baıjanbaev jetkizdi.

Qazaq sóz óneriniń qadir-qasıeti Baıjanbaevtyń qońyr úni arqyly aıshyqtaldy. Áıgili dıktordyń el rýhanııatyna qosqan eńbegin dáripteý barshamyzdyń ortaq paryzymyz», - dep jazdy Aqparat jáne qoǵamdyq damý mınıstri.

Іs-sharaǵa Ánýar Baıjanbaevtyń urpaqtary, kózin kórgen áriptesteri, radıo ardagerleri qatysyp, jyly lebizderi men estelikterin aıtqan.