Qazaq-qyrǵyz zııalylarynyń forýmy ótip jatyr
Sharaǵa Qyrǵyz Respýblıkasy Prezıdentiniń keńesshisi Sultan Raev, Halyqaralyq Túrki akademııasy prezıdentiniń keńesshisi Erjan Isaqulov, Osh oblysynyń gýbernatory Ýzarbek Jylqybaev, Osh qalasynyń meri Taalaı Sarbashev qatysyp, forýmǵa kelgen qonaqtarǵa quttyqtaý tilekterin arnady. Eki kúnge jalǵasatyn forýmdy uıymdastyrýǵa Qyrǵyzstan Prezıdenti ákimshiligi, Osh memlekettik ýnıversıteti qoldaý kórsetti. Zııalylar forýmy áıgili jazýshy Shyńǵys Aıtmatovtyń týǵanyna 90 jyl tolýyna oraı TWESCO uıymdastyrǵan sharalardyń jalǵasy bolyp sanalady. Túrki akademııasy 2018 jyldy «Aıtmatov jyly» dep jarııalap, birqatar is-sharalar uıymdastyryp keledi. Jazýshynyń mereıtoıyna oraı bıyl sáýir aıynda Astanada «Aıtmatov taǵylymy» atty halyqaralyq forým ótkizgen edi. Atalǵan jıyn qazaq-qyrǵyz zııalylary forýmy retinde baǵalanǵan bolatyn. Endi mundaı formattaǵy jıyn Qyrǵyzstan jerinde ótýde.
Osh qalasyndaǵy forýmǵa qazaq jáne qyrǵyz jazýshylary, aqyndary, ǵalymdar, sýretshiler men óner qaıratkerleri qatysýda. Forým barysynda TWESCO ázirlep, basyp shyǵarǵan, Qyrǵyzstannyń eks-memlekettik hatshysy Osmanakýn Ibraımovtyń «Aıtmatov. Poslednıı pısatel ımperıı», Maǵjan Jumabaevtyń «Arystan aıbat» degen atpen jaryq kórgen shyǵarmalar jınaǵy, Qadyraly Qonqabaevtyń «Atlas drevnetıýrskıh pısmennyh pamıatnıkov Respýblıkı Altaı», Emır Nadjıptiń «Istorıko-sravnıtelnyı slovar tıýrkskıh ıazykov 14 veka», «Joıylý qaýpindegi túrki tilderi» jáne ózge de birqatar kitaptardyń tanystyrylymy ótedi.
Sondaı-aq, forýmda qazaq-qyrǵyz baýyrlastyǵyna, mádenıet pen ádebıet, ǵylym jáne ózge de salalarǵa qatysty baıandamalar jasalyp, pikir almasý ótkizilmek.
