Qazaq kúresinen «Qazaqstan Barysy - 2024» týrnıri bastaldy
ASTANA. KAZINFORM – Búgin Astana qalasynda Respýblıka kúnine oraı qazaq kúresinen «Qazaqstan barysy-2024» respýblıkalyq týrnıri bastaldy.
Bul týrnırge oblystyq saıystardyń qorytyndysy boıynsha iriktelgen eldiń eń myqty balýandary jınaldy. Olar Qazaqstannyń 17 oblysy men respýblıkalyq mańyzy bar 3 qalany – Astana, Almaty jáne Shymkent qalalarynan kelgen balýandar ózara kim myqtyny anyqtaıdy.
Sonymen qatar, týrnırde byltyrǵy «Qazaqstan Barysy» chempıony jáne «Ásker Barysy» dodasynan eki balýan qatysyp jatyr. Barlyǵy – 42 qatysýshy. Týrnırdiń qorytyndysy boıynsha eń myqty balýan anyqtalyp, ol 15 mıllıon teńge kólemindegi bas júldeni ıelenedi. Jalpy júlde qory – 27 100 000 teńge, onyń 3 720 000 teńgesi sportshylardyń bapkerlerine bólingen.
Júldeler kelesideı bólinedi: 1-oryn - 15 000 000 teńge, 2-oryn - 3 300 000 teńge, 3-oryn - 1 080 000 teńge.
Budan bólek, ár jeńiske jetken beldesý úshin balýan 100 000 teńge alady.
Balýandar jerebe tartý rásiminen ótip, belgilengen nómirlerimen beldesýge shyǵady.
«Qazaqstan Barysy» týrnıriniń tóreshileri:
1. Pazylbek Qaırat — bas tóreshi
2. Ábdirahman Samyrat — bas hatshy
3. Akjıgıtov Bolat — tóreshi
4. Azamat Eradilov — tóreshi
5. Zıngın Alıbek — tóreshi
6. Oljas Kenehanov — tóreshi
7. Orymbaı Baýbek — tóreshi
8. Aıbol Orazǵalıev — tóreshi
9. Jetpis Serikbol — tóreshi
10. Ázız Qapbarov — tóreshi
Jarystyń ashylý saltanatynda QR Prezıdentiniń keńesshisi Qýanyshbek Esekeev qatysýshylardy quttyqtady.
«Qurmetti sport súıer qaýym! Respýblıka kúnine arnalǵan «Qazaqstan Barysy» týrnırine qosh keldińizder! Búgin ár óńirden kelgen balýandar óz aımaǵynyń namysyn qorǵaýǵa shyqpaq. Týrnırdi ashyq dep jarııalaımyn, barshańyzǵa sáttilik tileımin!» - dedi.
Sondaı-aq, qazaq dástúrine saı Erǵalı Mýhıdınov sportshylarǵa aq batasyn berip, ádil ári tabysty beldesýler tiledi.
«Qazaq balýandarynyń dańqy máńgi bıik bolsyn! Elimizde jáne alys-jaqyn elderde qazaqtyń rýhyn kóteretin batyrlar kóbeıe bersin! Búgingi týrnır ádil ári shyn myqtylardyń jeńisimen ótsin! Áýmın!» - dedi.
Alǵashqy beldesýler 16:00-de bastalady.
«Qazaqstan barysy-2024» týrnıriniń jeńimpazdary qansha syıaqy alatyny jaıly jazǵan bolatynbyz.
