Qazaq kınosy Qytaı festıvalinde kórsetildi
ASTANA. KAZINFORM – 2025 jyldyń 3-7 maýsym aralyǵynda Qytaıdyń Chýntsın qalasyndaǵy ıÝnchýan aýdanynda Shanhaı yntymaqtastyq uıymyna (ShYU) múshe elderdiń halyqaralyq kınofestıvali bastaldy. Bul týraly Mádenıet jáne aqparat mınıstrliginiń baspasóz qyzmeti habarlady.
Bul mádenı is-shara ShYU elderi arasyndaǵy gýmanıtarlyq baılanystardy damytýǵa jáne kıno salasyndaǵy yntymaqtastyqty keńeıtýge baǵyttalǵan.
Іs-sharaǵa Qazaqstandyq delegatsııa Mádenıet jáne aqparat mınıstrligi, Ulttyq kınony qoldaý memlekettik ortalyǵy, Sh. Aımanov atyndaǵy «Qazaqfılm» kınostýdııasy ókilderi, sondaı-aq elimizdiń tanymal prodıýserleri men rejısserleri qatysyp jatyr.
Bıylǵy festıvaldiń «Altyn Kamelııa» atty negizgi baıqaý baǵdarlamasyna 10 elden 20 fılm endi. Ár elden eki týyndy usynylǵan.
Qazaqstandyq «Nabat operatsııasy» men «Aǵaıyndylar» fılmi qytaı kórermenine kórsetiledi.
«Nabat operatsııasy» (rejısser Rashıd Súleımenov) — Qazaqstan quqyq qorǵaý organdary júrgizgen iri arnaıy operatsııa týraly shynaıy oqıǵaǵa negizdelgen drama. Fılm «Qazaqfılm» kınostýdııasynda QR Mádenıet jáne aqparat mınıstrligi, Qazaqstannyń Ulttyq kıno ortalyǵynyń qoldaýymen túsirilgen.
«Aǵaıyndylar» (rejısser Darhan Tólegenov) — 15-ten astam halyqaralyq júldege ıe bolǵan fılm. Kartına Germanııada ótken Oldenburg halyqaralyq kınofestıvalinde Spirit of Cinema marapatyn alǵan. Fılmdi Golden Man Media stýdııasy QR Mádenıet jáne aqparat mınıstrligi men Ulttyq kınony qoldaý memlekettik ortalyǵynyń qoldaýymen túsirgen.
Festıvaldiń qazylar alqasyna ShYU elderinen 9 belgili kınematograf engen. Olardyń ishinde qazaqstandyq prodıýser Tasbolat Merekenov te bar. Qazylar alqasynyń tóraǵasy — Qytaıdyń tanymal prodıýseri ári stsenarısti Jen Chjýnlýn.
Jeńimpazdar 10 nomınatsııa boıynsha anyqtalady. Atap aıtsaq, «Úzdik fılm», «Úzdik rejısser», «Úzdik stsenarıı» jáne akterlik sheberlik nomınatsııalary bar.
Kınofestıval aıasynda 11 negizgi is-shara josparlanǵan, olardyń qatarynda baıqaý fılmderiniń kórsetilimderi, yntymaqtastyqqa arnalǵan forýmdar, kınotehnologııa kórmesi men Gala-kontsert bar.
Aıta ketelik Reseı men Qazaqstan birlesip túsirgen fılm Shanhaı kınofestıvalinde júlde alǵan edi.