Qazaq ym-ıshara tili men daktıl álipbıin qabyldaý máselesi pysyqtalady
ASTANA. KAZINFORM – Qazaq ym-ıshara tili men daktıl álipbıin qabyldaý máselesi pysyqtalady. Bul týraly Májilis depýtattarynyń saýalyna Premer-Mınıstrdiń orynbasary Ermek Kósherbaevtyń jaýabynda aıtylǵan.
- Qazaqstan Respýblıkasy 2023 jylǵy 7 maýsymda halyqaralyq Múgedekterdiń quqyqtary týraly konventsııany ratıfıkatsııalady. Konventsııanyń 21-babyna sáıkes qatysýshylar ózderiniń tańdaýy boıynsha qarym-qatynastyń barlyq nysanyn paıdalana otyryp, aqparat pen ıdeıalardy basqalarmen teń dárejede alý jáne taratý erkindigin qosa alǵanda, kózqarasy men nanym-senimin bildirý erkindigi quqyǵyn paıdalanýyn qamtamasyz etý úshin barlyq tıisti sharany qabyldaıdy, - dep atap ótedi vıtse-premer jaýabynda.
Ermek Kósherbaev halyqaralyq tájirıbege sáıkes Ulybrıtanııada, Islandııada, Aýstralııada, Jańa Zelandııada, Norvegııada, Avstrııada, Ispanııada, Shvetsııada, Ońtústik Afrıka Respýblıkasynda ym-ıshara tili resmı moıyndalǵanyn atap ótedi.
- Aldaǵy kezeńde Qazaqstannyń shetelderdegi mekemelerin tarta otyryp, álemdegi ym-ıshara tilderi men daktıl álipbıleriniń resmı bekitilýine (moıyndalýyna) qatysty halyqaralyq tájirıbe zerdelenetin bolady. Odan keıingi kezeńde memleket pen qoǵamnyń ınklıýzıvtiligi turǵysynan múddeli memlekettik organdar beıindi uıymdar ókilderimen birlesip, qazaq ym-ıshara tili men daktıl álipbıin qabyldaý máselesi egjeı-tegjeıli pysyqtalatyn bolady, - dedi Úkimet basshysynyń orynbasary.
Jasandy ıntellektiniń kómegimen ym tili qazaqshalanǵanyn buǵan deıin jazǵan edik.