QAZAQ HANDYǴYNA 550 JYL: Almatyda «Qazaq fılosofııasynyń tarıhy» atty kitaptyń tanystyrylymy ótti
QR Bilim jáne ǵylymı mınıstrligi Ǵylym komıtetiniń Fılosofııa, saıasattaný jáne dintaný ınstıtýty ǵalymdarynyń bul eńbegi Qazaq handyǵynyń 550 jyldyǵyna arnalyp otyr.
Kitaptyń birinshi tomy «Qazaq fılosofııasynyń qalyptasýy: ejelgi túrkilik dáýir», ekinshisi «XV-XIX ǵasyrlardaǵy qazaq fılosofııasynyń tarıhı sıpattamasy» dep atalady.
«Moraldyq qundylyqtar - eń negizgi fılosofııalyq kózqarastyń túp-tamyry, irgetasy ekenin biz anyqtap kórsetip berdik. Sonaý ál-Farabı fılosofııasy, Qorqyt fılosofııasy, odan bergi mynaý qazaq jyraýlary, aqyndary, bı-sheshenderi - bári toptastyrylyp, osy eki tomda kórsetilgen. Negizgi oı - tek qana maqtaı berý emes, onyń ishindegi mynaý qaıshylyqty kezeńder qandaı, adamdy nege sondaı oıǵa jeteledi, mine solardy ashyp berýge tyrystyq», - dedi óz sózinde fılosofııa ǵylymdarynyń doktory, professor Serik Nurmuratov.
Ol sonymen qatar, qazir úshinshi, tórtinshi jáne besinshi tomdarǵa qajetti materıaldardy jınaý, toptastyrý jumystary júrgizilip jatqandyǵyn jetkizdi.
«Bular Abaı, Shákárim odan keıingi qazaq zııalylaryn qamtıdy. Budan soń keshegi keńestik dáýirdegi kásibı fılosofııamyzdy taldap beremiz. Sodan keıin táýelsizdik kezeńine aýysamyz. Bul jerde qazaq halqynyń ejelgi zamannan qazirgi kezeńge deıingi jınaqtaǵan danalyq sózderi qandaı, halqymyzǵa qandaı qundylyq usynýǵa bolady, stýdent jastar neni alyp, neni oqı alady, halyqtyq fılosofııa qandaı? Mine solarǵa jaýap berýge tyrysamyz», - dedi S. Nurmuratov.
Sonymen qatar, ǵylymı forýmǵa qatysýshylar qazaq rýhanı álemine qatysty sońǵy jyldary ınstıtýt mamandarynyń jeke jáne ujymdyq monografııalar túrinde jarııalaǵan eńbekteriniń toptamasymen, kásibı mamandar daıyndaǵan «Fılosofııa jáne saıasattaný» salasy boıynsha termınologııalyq sózdikpen tanysty.
«Dóńgelek ústelde» qazaq fılosofııasynyń tarıhyn zertteýdiń ǵylymı ádistemesi, qazaq bolmysyn zertteýde qol jetkizilgen eń mańyzdy nátıjeler, onyń keleshegi sııaqty kókeıtestiligi zor máseleler boıynsha elimizdiń belgili fılosoftary, mádenıettanýshylary jáne gýmanıtarlyq salalardyń jas ǵalymdary óz oı-pikirlerin ortaǵa saldy.
