Qazaq halyq aspaptary Bishkek turǵyndaryn tánti etti
ASTANA. KAZINFORM – Bishkektegi K.Moldobasanov atyndaǵy ulttyq konservatorııada A.Jubanov atyndaǵy qazaq halyq aspaptary orkestriniń «Qazaq-Qyrǵyz bir týǵan» atty kontserti ótti, dep habarlaıdy Kazinform agenttiginiń menshikti tilshisi.
Orkesterdiń kórkemdik jetekshisi jáne dırıjeri, eńbegi sińgen qaıratker Dáýren Ǵylymovtyń jáne bas dırıjer, «Eren eńbegi úshin» medaliniń ıegeri Madına Qabijanovanyń basqarýymen jáne mádenıet salasynyń úzdigi Manzýra Saparovanyń, halyqaralyq jáne respýblıkalyq baıqaýlardyń laýreattary Jalǵas Bolatuly, Gaýhar Salamas, Amanjol Ótemuratov, Orazǵalı Saǵıtjanuly jáne Sáýle Zınettiń oryndaýynda tanymal mýzykalyq shyǵarmalar, qazaq kúıleri men ánderi oryndaldy.
Ǵ.Jubanova atyndaǵy Aqtóbe oblystyq fılarmonııasynyń dırektory Dına Nııazova Bishkekke alǵash ret kelip turǵanyn jáne qalanyń unaǵanyn jetkizdi.
- Men jáne kórkemdik jetekshimiz Qyrǵyzstanǵa alǵash ret kelip otyrmyz. Bishkekti óz kózińmen kórý - sońǵy jyldardaǵy arman bolatyn. «Qazaq – Qyrǵyz bir týǵan» dep beker aıtpaǵan-aý, biz ózimizdi týǵan eldegideı erkin sezinip turmyz. Biz elimizdegi festıvaldarda óner kórsetken qyrǵyz ártisterin bilemiz. Bizdiń mádenıetimiz uqsas. Degenmen olardyń árqaısysynyń ereksheligi bar. Qyrǵyzstannyń tańǵajaıyp halyq mýzykasy, qyrǵyz ánderiniń sazdy áýenderi, ádemi kúıleri bar. Búgin kontserttik baǵdarlamada qazaq mýzykasy oryndalsa, kesh sońynda qazaq jáne qyrǵyz mýzykanttary birlesip óner kórsetedi. Ejelden kele jatqan dostyqty nyǵaıta túsetin mundaı shyǵarmashylyq kezdesýler turaqty bolýy kerek, - dedi ol.
Orkestrdiń kórkemdik jetekshisi ári dırıjeri Dáýren Ǵylymov kontsertti «Qazaq - Qyrǵyz bir týǵan» dep ataýdyń ıdeıasy týraly baıandap berdi.
- Belgili qyrǵyz dırıjeri Baqyt Tilegenov jetekshilik etetin Bishkek qalalyq ákimdiginiń halyq aspaptary orkestri Aqtóbege dál osyndaı sımvolıkalyq ataýmen kontsertpen keldi. Qazaq orkestriniń Bishkekte óner kórsetýi – ortaq tarıh, mádenıet, til men dástúr biriktirgen eki baýyrlas halyqtyń mádenı baılanysyn nyǵaıtý ıdeıasynyń jalǵasy. Kontserttik baǵdarlama Qurmanǵazynyń áıgili shyǵarmalaryn, qazaqtyń halyq jáne klassıkalyq ánderin qamtıdy, sondaı-aq álemdik klassıka men qyrǵyzdyń birneshe shyǵarmalary oryndalady. Kórermen kóńilinen shyǵyp, olar bizge fantastıkalyq qoldaý kórsetedi dep senemiz, - dedi dırıjer.
Kontsert bishkektik kórermenniń dý qol shapalaqtaýymen aıaqtaldy.
Buǵan deıin elorda qonaqtary men turǵyndaryna lırıkalyq-dramalyq qoıylymdar usynǵan Shyǵys Qazaqstan oblystyq drama jáne operetta teatrynyń Bishkektegi gastroldik sapary týraly jazǵan bolatynbyz.