Qazaq ǵalymdary energııany máńgi saqtaıtyn akkýmýlıatordyń prototıpin jasap jatyr
ASTANA. KAZINFORM - Sátbaev ýnıversıteti Fızıka-tehnıkalyq ınstıtýtynyń jas ǵalymdary – ǵylymı qyzmetker Arman Ómirzaqov pen PhD doktory Áljan Baımenov vanadıı akkýmýlıatorynda qoldanylatyn vanadıı elektrolıtin tazartyp óndirýdiń otandyq tehnologııasyn jasap júr.
ıAǵnı lıtıı-ıondy akkýmýlıatorlarynda órt jáne jarylys qaýpi óte joǵary bolǵandyqtan vanadıı akkýmýlıatorlary lıtıı-ıondy akkýmýlıatorlarǵa balama bola alady.
Al vanadıı akkýmýlıatorlary qaýipsiz ǵana bolyp qoımaı, sondaı-aq olar ekologııalyq tazalyǵymen de erekshelenedi.
Sebebi olar uzaq ýaqyt qyzmet etip, qaıta óńdeýge jáne qaıta paıdalanýǵa bolatyn elektrolıtterdi ýtıldeýdi qajet etpeıdi.Alynǵan nátıjelerge sáıkes, aldaǵy ýaqytta vanadıı akkýmýlıatorlarynyń óndirisin qolǵa alý josparlanǵan.
Óıtkeni kún men jel energııasyn birlesip paıdalaný jańartylatyn energııa kózderiniń ekonomıkalyq tıimdiligin ondaǵan ese arttyrady jáne joǵary deńgeıli ekologııalyq qaýipsizdikti qamtamasyz etedi.
Álemdik tájirıbede totyǵý-totyqsyzdandyratyn batareıalar úshin vanadıı elektrolıtterin óndirý qarqyndy damýda, óıtkeni vanadıı akkýmýlıatory – máńgilik energııa qoımasy retinde jumys isteıdi, al onyń jumys temperatýrasynyń dıapazony 10-40 gradýsqa deıin bolady.
Vanadıı akkýmýlıatorlary energııa saqtaý qoımalary retinde únemi ekologııalyq taza, jyldam jáne turaqty energııamen qamtamasyz etip otyrady.
Akkýmýlıatorlardyń jańa býyny joǵary senimdilikpen, saqtaý turaqtylyǵymen jáne óte jyldam ýaqyt reaktsııasymen sıpattalatyn bolady, ári olardy kúndelikti energetıkalyq júıelerde qoldanýǵa bolady.
Kez kelgen elektr qýatynyń úzilýi kezinde olar rezervtik qýat kózi retinde sezimtal júıelerdiń jumys isteýine múmkindik beredi, sonymen qatar senimdi jáne myqty elektr jelisi joq jerlerdi elektr kózimen qamtamasyz etýge kepildik bere alatyn qabiletke ıe.
