Qazaq eli aýqymdy, saıası-áleýmettik ózgerister aldynda tur – Erlan Qoshanov
«Qazaq eli aýqymdy, saıası-áleýmettik ózgerister aldynda tur. Qozǵalys ózgeristerge, ómirsheń ózgeris keń óriske bastaıdy. Álemdegi jetekshi elderdiń bári keshendi reformany bastan keshken. Bılik pen qoǵam úılesim taýyp, halqynyń yntymaǵy jarasqan elder utylmaı ult bolyp uıysyp otyr. Al biriniń qoly biriniń jaǵasynda ketip, ózara alaýyz bolǵan jurttyń juqanasy da qalǵan joq. Bul tarıhtyń aşy da bolsa shyndyǵy. Muny nege aıtyp otyrmyz? Kúrmeýi qıyn kúrdeli sátke qaramastan Memleket basshysynyń qysqa merzimde qolǵa alǵan túbegeıli reformalary óz jemisin bere bastady. Eldegi saıası, memlekettik basqarý úlgisi jańa sapaǵa kóterildi. Eń bastysy barlyq salada ádilettilik, teńdik prıntsıpteri qalyptasyp, áleýetti azamattyq qoǵam ornyǵyp keledi. Bul jańa dáýirdiń bastaýy», - dedi Erlan Qoshanov Qasym-Jomart Toqaevtyń kandıdatýrasyn qoldaý jónindegi halyqtyq koalıtsııanyń forýmynda.
Májilis tóraǵasy qoǵamda pikir erkindigi, demokratııa qaǵıdalary saltanat quryp jatqanyn atap ótti.
«Atqarylyp jatqan jumystardyń negizgi maqsaty - saıası, ekonomıkalyq, áleýmettik reformalardy tabandy túrde júzege asyryp, Ádiletti Qazaqstan qurý. Osy oraıda bıylǵy jyldyń 20 qarashasyndaǵy Prezıdent saılaýy Qazaqstannyń saıası tarıhyndaǵy asa mańyzdy oqıǵa. Memleket basshysy Qasym-Jomart Toqaev kezekten tys Prezıdent saılaýynyń, Parlament Májilisi men máslıhattar saılaýynyń kestesin aldyn ala jarııalady. Bul - el tarıhynda buryn-sońdy bolmaǵan demokratııalyq qadam, jańa saıası mádenıettiń nyshany. Saılaý jalpyhalyqtyń referendýmdaǵy tańdaý men jańa Konstıtýtsııalyq ózgerister negizinde ótkizilmek. Aldaǵy saılaýlar el ishindegi saıası kúshterdiń, halyqaralyq qaýymdastyqtyń aıryqsha qyzyǵýshylyǵyn týdyryp otyr. Prezıdent saılaýynyń dúbiri estilgeli beri eldegi iri saıası partııalar, qoǵamdyq uıymdar ózderiniń jıyndaryn shaqyryp, saılaýǵa qatysty is-qımyldaryn bastap ketti», - dedi ol.
