Qazaq baletiniń ańyzy Bolat Aıýhanov dúnıeden ótti
Qaraly habardy memlekettik akademııalyq bı teatrynyń baspasóz qyzmeti aqparatty rastady.Bolat Ǵazızuly Aıýhanov 1938 jyly Semeıde dúnıege keldi. Soǵystan keıingi jyldary otbasy Almatyǵa kóship keldi de, 1955 jyly Aıýhanov Almaty horeografııa ýchılışesin bitirdi. Odan keıin eki jyl Lenıngrad horeografııa ýchılışesinde tájirıbeden ótti.
Ol eńbek jolyn 1957 jyly Abaı atyndaǵy Qazaq memlekettik akademııalyq opera jáne balet teatrynda balet artısi bolyp bastady. Al 1959-1964 jyldary A.V. Lýnacharskıı atyndaǵy Máskeý memlekettik teatr óner ınstıtýtynyń horeografııa bóliminde bilim aldy.
Almatyǵa qaıtyp kelisimen 26 jasynda Almaty horeografııa mektebin basqarady. Abaı atyndaǵy qazaq memlekettik akademııalyq opera jáne balet teatrynda horeograf bolyp jumys istep júrip, ol jetekshi balerına Inessa Manskaıamen birge ózderi uıymdastyrǵan «Eki akter teatrynda» óner kórsetti.
Baletmeıster 1965 jyldan 2010 jylǵa deıin Qazaqstan kompozıtorlarynyń mýzykasyna 30-dan astam teatr qoıylymyn qoıǵan. Onyń qoıylymdaryn Eýropa, Azııa, Soltústik Amerıka jurty da tamashalady.
Artıstiń «Qyz Jibek», «Gamlet», «Karmen-sıýıta», «Shyńǵyshan», «Bolero», «Qazaq sývenıri», «Batyrlar» jáne basqa da qoıylymdary — qazaq baletiniń altyn qoryna engen spektaklder.
Bolat Aıýhanov Qazaq KSR Memlekettik syılyǵynyń, Qazaqstannyń «Platınaly Tarlan» táýelsiz otbasylyq klýbynyń marapatynyń, «Fomged» Halyqaralyq bı festıvaliniń (Túrkııa) altyn medaliniń, sonymen qatar mádenıet jáne óner salasyndaǵy halyqaralyq Sokrat syılyǵynyń ıegeri.
Bolat Aıýhanovpen qoshtasý rásimi 15 jeltoqsanda Abaı atyndaǵy Qazaq ulttyq opera jáne balet teatrynda ótedi.