«Qazaq balasynyń jeńimpazdyq rýhyn kim oıatady?» - respýblıkalyq basylymdarǵa sholý
***
«Egemen Qazaqstan» basylymy búgingi sanynda «Zaman ózgergende biz de ózgerýimiz kerek» degen taqyryppen maqala basty. Onda Elbasynyń Joldaýǵa baılanysty shyǵarmashylyq salasynyń ókilderimen bolǵan kezdesýinde aıtylǵan máseleler baıandalady. Kezdesýde Joldaýda kóterilgen mindetter men elimizdiń damý tarıhyn sholyp ótken Elbasy «men kóptegen maqsatqa merziminen buryn qol jetkizgenimizge senemin, óıtkeni bul bizdiń qoǵamdy toptastyrýdy nyǵaıtýǵa múmkindik beredi. Biz úshin elimizdi jańǵyrtý úderisterine árbir qazaqstandyqtyń atsalysqany óte qajet. Bul ásirese, 2011 jyldy Táýelsizdigimizdiń 20 jyldyǵynyń jyly dep jarııalaǵan jyly óte mańyzdy. Táýelsizdik mereıtoıy Otanymyzdyń órkendeýi men damýy úshin barshamyzdy jasampazdyq eńbekke, jańa jetistikter men tabystarǵa jetýimizge yqpal etýi tıis»,-deıdi Memleket basshysy.
Sondaı-aq atalmysh basylymda «Eńbekpen qamtýdyń baǵdarlamasy pysyqtalýda» atty maqala jaryq kórdi. Onda Eńbek jáne halyqty áleýmettik qorǵaý mınıstrliginiń halyqty eńbekpen qamtýdyń jańa baǵdarlamasynda qamtylǵan sharalary týraly baıandalady. Mınıstr Gúlshara Ábdihalyqovanyń aıtýynsha, talqylaýǵa usynylyp otyrǵan jańa baǵdarlamanyń basty úsh maqsaty bar. Olar birinshiden, halqymyzdyń ómir súrý tabysyn kóbeıtý, ekinshiden, elimizde qabyldanǵan údemeli ındýstrııalyq-ınnovatsııalyq damý baǵdarlamasyn is júzine asyratyn bilikti kadrlardy daıarlaý, úshinshiden, áleýmettik kómek júıesin jetildirý bolyp tabylady. Ústimizdegi jyly qanatqaqty joba retinde baǵdarlamanyń birinshi kezeńi is júzine asyrylmaq. Elbasynyń Joldaýyna baılanysty júzege asyrylatyn turǵyndardy eńbekpen qamtýdyń tolyqqandy baǵdarlamasy 2012 jyldan bastap ómirge engizile bastaıdy.
***
«Aıqyn» basylymynyń búgingi sanynda «Prezıdent bolatyn azamat tildi qurmetteý jaǵynan da úlgi bolýy kerek» degen maqala jarııalandy. Atalmysh maqalaǵa keshe Astanada ótken Ortalyq saılaý komıssııasynyń otyrysynda kóterilgen máseleler arqaý bolǵan. Otyrys barysynda komıssııa tóraǵasy Qýandyq Turǵanqulov: «Sońǵy ýaqytta respýblıka azamattarynyń memlekettik tildi bilý deńgeıine qoıylatyn talaptar kúsheıdi. Sondyqtan Memleket basshysy laýazymyna kandıdat úshin bul óte mańyzdy másele», - dedi. Elbasynyń bıylǵy Joldaýynda: «Aldaǵy jyldary halyqtyń 80 paıyzǵa jýyǵy memlekettik tildi meńgerýi tıis» degen maqsat qoıǵandyǵyn tilge tıek etken tóraǵa úmitkerler memlekettik tildi erkin meńgergendigin dáleldep, emtıhan tapsyrýy tıistigin atap kórsetti. «Saılanǵan Prezıdent halqynyń basym kópshiligi qazaq tilin biletin memleketti basqaratyn bolady» dedi ol.
Sondaı-aq atalmysh basylym «Qaǵıda men tájirıbe qatar meńgerilýi tıis» degen taqyryppen maqala basty. Onda keshe Halyqaralyq Bıznes akademııasynda bas qosqan otandyq jáne sheteldik mamandardyń «Zamanaýı bıznes bilim - onjyldyqtar qorytyndysy» atty dóńgelek ústel otyrysynda kótergen máseleleri jóninde baıandalady. Jıynǵa qatysýshylardyń paıymdaýlarynsha, naryqtyq qatynastar ornaǵan búgingi zamanda bıznes bilimniń qajettiginde sóz joq. Másele - ony zaman talabyna saı bere bilýde. Bizdegi bıznes bilimniń tarıhy táýelsizdik alǵan tustan bastalatynyn eskersek, talaı jyldyq tájirıbesi bar batystyq bilim berý júıesimen básekege túse almaımyz. Degenmen ekonomıka damysyn desek, ony alǵa súıreıtin qara kúsh - kadrlardy daıyndaý máselesine basa nazar aýdarý kerek. Otyrysta kóterilgen máseleler týraly tolyǵyraq bilgińiz kelse, «Aıqynnyń» búgingi sanyn jiberip almańyz.
***
«Alash aınasy» basylymy búgingi sanynda «Qazaq balasynyń jeńimpazdyq rýhyn kim oıatady?» degen taqyryppen maqala jarııalady. Onda elimizdiń jastarynyń sportqa degen kózqarasy men osy salada qalyptasqan kúrdeli máseleler týrasynda aıtylady. Maqala avtorynyń jazýynsha, shynynda qazaqtyń balasy kókpar men báıgede, qusbegilik pen ańshylyqta, kúres pen judyryqtasýda aldyna jan salmaıdy. «Boıdaǵy qara kúsh bizge qanmen sińgen bolsa kerek. Desek te, ultymyzǵa tán jarys syndarynan bólek kúlli álemge keńinen taraǵan ózge de sport túrleri jetip-artylady emes pe?! Qarap otyrsaq, qandaı da bir sporttyq jarystardaǵy básekelerde elimizdiń atynan negizinen ózge ult ókilderi shyǵyp, jarqyrap kórinip júredi. Olar bolmasa, biz tipti halyqaralyq, álemdik jarystardyń tómengi satysynda turar ma edik?», delingen maqalada.
Sondaı-aq atalmysh basylymnyń jazýynsha, «Azıada qazaqqa rýh berdi». Osyndaı taqyryppen jarııalanǵan suhbatta QR Týrızm jáne sporty mınıstrligi, Sport komıtetiniń tóraǵasy Elsııar Qanaǵatov Azıadadan keıingi oılarymen bólisedi. Komıtet tóraǵasynyń aıtýynsha, jalpykomandalyq eseptegi birinshi ornymyz sporttyq báseke turǵysyndaǵy tarıhı jetistigimiz ǵana emes, sportty nasıhattaýdaǵy úlken jetistigimiz de. «VII qysqy Azııa oıyndary aldaǵy ýaqytta buqaralyq sportty damytýǵa septigin tıgizetin mańyzy zor tamasha sporttyq shara bolady. Osy Azııa oıyndary qazaq balalarynyń qysqy sport túrlerine degen qyzyǵýshylyqtaryn arttyrady, qysqy sport túrlerindegi jetkinshekterimizdiń sany artady dep oılaımyn»,-deıdi E.Qanaǵatov. Bul suhbatty «Alash aınasy» basylymynyń búgingi sanynan oqýǵa bolady.
***
«Kazahstanskaıa pravda» basylymynyń jazýynsha, elimizde 8 jyldan beri júzege asyrylyp kele jatqan «Aýyz sý» baǵdarlamasynyń jaı-kúıi halyq qalaýlylarynyń da, mınıstrlik pen vedomstvo basshylarynyń da alańdaýshylyǵyn týdyrýda. Sebebi baǵdarlamaǵa bólingen qarjy birde durys josparlanbaı, birde maqsatsyz jumsalyp, talan-tarajǵa salynyp otyr. Jobany júzege asyrý barysynda kóptegen zańbuzýshylyqtarǵa jol berilgen. Al bıylǵy jyly elimizde 2020 jylǵa deıingi aralyqty qamtıtyn «Aq bulaq» baǵdarlamasy iske qosylmaq. Osyǵan oraı «Aýyz sý» baǵdarlamasyn júzege asyrýda oryn alǵan jemqorlyq áreketteri «Aq bulaq» baǵdarlamasyna da zardabyn tıgize me degen qaýip te joq emes. Bul máseleniń mán-jaıyn tereńirek bilgińiz kelse, «Kazahstanskaıa pravdanyń» búgingi sanyn oqyńyz.
