Qazaq balasy Dýbaıda ótken oısha esepteý jarysynda top jardy

DÝBAI. QazAqparat - Birikken Arab Ámirliginiń Dýbaı qalasynda 7 eldiń jasóspirimderi arasynda mentaldy arıfmetıkadan synǵa túsken qazaqstandyq Álıasqar Kývatov top jardy, dep habarlaıdy QazAqparat.

Tamyz aıynyń basynda Dýbaıda ótken halyqaralyq jarysqa 7 elden kelgen 15 jasqa deıingi 150-den astam balalar qatysqan bolatyn. Jasóspirimder jarty saǵatta 250 túrli esepti oısha ári jyldam shyǵarýy tıis edi. Bul mindetti qazaqstandyq Álıasqar Kývatov minsiz oryndap, ár elden kelgen oqytýshylardyń ózin tamsandyrdy. Nátıjesinde pavlodarlyq óren gran-prı ıelendi.

Aıta ketý kerek, Álıasqar buǵan deıin Mysyrda ótken chempıonatta da gran-prı alǵan. Al Túrkııada birinshi oryn ıegeri atanǵan edi.