Qazaq balasy týraly fılm Altaıda kún saıyn kórsetilip jatyr – sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Ór Altaıdaǵy halyqaralyq qar shańǵy alańy ashylý aldynda tur – Ukilialtay
Qazan aıynan beri tolassyz jaýǵan qarmen Shińgil aýdanyndaǵy «Shińgil Lańshan» halyqaralyq shańǵy bazasynda jaýǵan qardyń qalyńdyǵy 25-30 santımetrge jetip, shańǵy tebý maýsymy bastalǵaly tur. Bul týraly osy aptada Qytaıdyń «Ukilialtay» saıty habarlady.
Qytaılyq BAQ-tyń jazýynsha, Shińgil aýdany soltústik endiktiń 45-47 gradýsy aralyǵyndaǵy álemniń altyn shańǵy beldeýinde, «Qytaıdyń qarly astanasy» dep atalǵan Altaı aımaǵynyń soltústik shyǵysynda, ór Altaıda ornalasqan.
Shińgil Lańshan halyqaralyq taý shańǵysy kýrorty 4A deńgeıimen týrıstik jaqtan tartymdylyǵy joǵary.
«Atalǵan demalys orny Shińgil qalasynan nebári 12 shaqyrym jerde ornalasqan jáne týrısterge qyzmet kórsetýdiń tolyq múmkindikteri bar. Bul qar shańǵy alańy bıyl 9 shańǵy jolyn salyp (6 joǵary dárejeli jol, 2 orta dárejeli jol, bir bastaýysh dárejeli jol), shańǵy jolynyń eń úlken kólbeýlik parqy búkil el boıynsha 9-orynǵa jetti. Qoldanylatyn qar jamylǵysy respýblıkada 3-orynda. Sol arqyly ol halyqaralyq taý shańǵysy kýrorty retinde baǵalanady», - dep jazady qytaılyq BAQ.
Samarqanda Túrki memleketteriniń aqsaqaldary bas qosty – «ÓzA»
Samarqanda Túrki memleketteri uıymy Aqsaqaldar keńesiniń on tórtinshi otyrysy bastaldy. Jıynǵa Ózbekstan, Ázerbaıjan, Túrkııa, Túrkimenstan, Qazaqstan, Qyrǵyzstan aqsaqaldarymen birge Vengrııa men Soltústik Kıpr Túrik Respýblıkasynyń ókilderi qatysyp jatyr, dep habarlady «ÓzA» aqparattyq agenttigi.
Atalǵan BAQ-tyń málimetinshe, jıynǵa Túrki memleketteri uıymy Aqsaqaldar keńesiniń tóraǵasy Bınalı Iyldyrym tóraǵalyq etip jatyr.
Konferentsııada Túrki memleketteri uıymynyń bas hatshysy Kýbanıchbek Omýralıev sóz sóılegen.
Kóptiń kóńilinen shyǵa bilgen Gúlmereı – Janadauir.com
Aımaq ortalyǵynda kóptegen sulýlyq salondary qyzmet kórsetedi. Keıbireýi 5-6 adamdy jumyspen qamtyp otyr. Ár kún saıyn osy ortalyqtarynyń jumysy qaýyrt júrip jatady. Ásirese mereke kúnderi sulýlyq salondarynda ıne shanshar oryn bolmaıdy. Redaktsııamyzdyń «Kásibim-nesibem» aıdarynyń kelesi qonaǵy shashtaraz Gúlmereı Sansyzbaıqyzy, dep jazady mońǵolııalyq Janadauir.com saıty.
Atalǵan basylym málimetinshe, kóptiń kóńilinen shyǵa bilgendikten klıentteri ony «Kúma» dep ataıdy. Endi nazarlaryńyzǵa Kúmádan alǵan suhbattyń jazbasha nusqasyn usynbaqpyz, dep kásipkerden shaǵyn suhbat alǵan.
Gúlmereı esimdi kásipker qazir Ólgıı sumynynda enesi, joldasy jáne úsh balasymen birge turady. Atalǵan kásippen aınalysqanyna 15 jyl bolypty. 7 jyl Qazaqstanda, 8 jyl qazirgi turǵan ornynda jumys istep keledi eken.
Gúlmereı Sansyzbaıqyzy tilshiniń qoıǵan taǵy birneshe suraqtaryna jaýap bergen.
Túrki Memleketteri Uıymy BAQ ókilderi bas qosty – «TRT»
Qyrǵyzstanda Túrki Memleketteri Uıymynyń (TMU) BAQ jáne aqparat salasyndaǵy yntymaqtastyq jumys tobynyń 10-shy otyrysy ótti.
El astanasy Bishkekte Mádenıet, aqparat, sport jáne jastar saıasaty vıtse-mınıstri Chyńǵyz Esengululynyń tóraǵalyǵymen ótken jıynǵa Ázerbaıjan, Túrkııa, Qyrǵyzstan, Qazaqstan, Ózbekstan jáne Túrikmenstannan memlekettik qyzmetkerler men BAQ basshylary qatysty. Bul týraly Túrkııa Radıo Televızııa portaly habarlady.
Atalǵan basylymnyń keltirgen málimetine súıensek, kezdesýge Túrkııadan Prezıdenttik apparat janyndaǵy Kommýnıkatsııa basqarmasynyń Qoǵamdyq dıplomatııa departamentiniń basshysy Ogýz Gúner, Anadoly agenttiginiń (AA) strategııalyq kommýnıkatsııalar jáne syrtqy baılanystar menedjeri Hazal Dýran, TRT Avaz halyqaralyq baılanystar jáne korporatıvtik kommýnıkatsııalar qyzmetkeri Gókchen Oǵan qatysqan.
BAQ jáne aqparat salasyndaǵy yntymaqtastyq jónindegi jumys tobynyń otyrysy aıasynda «ChatGPT jasandy ıntellekt qosymshasy mysalynda jasandy ıntellekttiń artyqshylyqtary men kemshilikteri» jáne «Gıbrıdtik soǵystar XXI ǵasyrdaǵy qaýipsizdik qateri» atty eki sessııa ótken.
Qazaqstan men BAÁ 37 mln dollarlyq kelisimshartqa qol qoıdy – «Parstoday»
Qazaqstannyń Saýda jáne ıntegratsııa vıtse-mınıstri bastaǵan qazaqstandyq óndirýshiler delegatsııasy Dýbaıǵa sapar barysynda jalpy quny 37 mln dollar turatyn eksporttyq kelisimsharttarǵa qol qoıdy. Bul týraly osy aptada «Parstoday» aqparat agenttigi de habarlady.
Irandyq aqparat agenttigi Qazaqstannyń Saýda jáne ıntegratsııa vıtse-mınıstri Qaırat Tórebaevtiń pikiri boıynsha habarlaǵan.
Qaırat Tórebaevtiń aıtýynsha, Qazaqstan kompanııalary 90-ǵa jýyq taýar túri, sonyń ishinde metallýrgııa, hımııa, tamaq ónerkásipteri ónimderi, tasymal, qurylys materıaldary men farmatsevtıkalyq ónimderdi usynýǵa daıyn.
Sonymen qatar vıtse-mınıstr BAÁ naryǵy Qazaqstan taýarlary úshin basty eksporttyq baǵyttardyń qatarynda ekenin aıtty. 2022 jyly BAÁ-ge eksporttalǵan qazaqstandyq ónimder quny 3,560 mln dollarǵa jetkenin tilgen tıek etken.
Qazaq balasy týraly fılm Altaıda kún qurǵatpaı qoıylyp jatyr – «Úkili Altaı»
Jaqynnan beri Shyńjań ólkelik «Tıan-Shan» kınostýdııasy túsirgen «Shabandoz» atty fılm Altaıda kún saıyn qoıylyp jatyr, dep habarlaıdy Qytaıdyń «Ukilialtay» aqparattyq portaly.
«Shabandoz» altaılyq kórermender arasynda suranysqa ıe. Sol kórermenderdiń biri Shýı Shııaýhýn osy fılmdi kórip erekshe áser alǵanyn aıtady.
«Kınodaǵy ártisterdiń deni kásibı ártis bolmaǵanymen, olardyń shynaıy da qarapaıym akterlik óneri fılmniń kórkemdigin arttyrǵan deýge bolady. Bala keıipker Ańsardyń boıyndaǵy ór rýhtan erekshe áser aldym. Ańsar basynan ótken qıynshylyqtardy eńserip, sońynda óz armanyna jetti. Osy arqyly bul fılm bizge ómir jolynda armanǵa jetý úshin úlken kúsh-jiger kerek ekenin túsindiredi», - deıdi ol.
Qazaq balasy týraly «Tıan-Shan» kınostýdııasy túsirgen bul balalar taqyrybyndaǵy fılm resmı túrde bıyl 9 tamyzda prokatqa shyqqan bolatyn.
Aıta keteıik, «Shabandoz» fılminde qazaqtyń jas balasy Ańsar óz armanyn júzege asyrý úshin atqa minýi baıandalady. Sondaı-aq fılmde Altaıdyń ásem tabıǵaty da kórsetilgen.
Sonymen qatar bul fılmde qazaqtyń atqa miný mádenıeti men túrli etnostardyń bir-birine kómektesýi ózek etilgen.
Qytaılyq BAQ-tyń dereginshe, rejısser osy kınoda kórkem dala tabıǵatynyń kórinisterin alý arqyly bir jyldyń tórt maýsymynda túrlenip turatyn Altaı aımaǵynyń tańǵajaıyp kórkem kórinisterin kórsetken. Fılmde kishkentaı Ańsardyń ómirindegi qıyndyqtary men arman-muraty baıandalǵan. Sol arqyly Ańsardyń at báıgesinde bas júldeni alyp, óziniń aǵa-baýyrlarymen qalaı tatý-tátti ómir súrip, áke-sheshesiniń súıispenshiligin túsinedi. Bas keıipkerdiń jaqsy dostar arasyndaǵy ýádeden aınymaýy, kóptiń kómeginde meıirge bólenip, eseıip, er jetýi baıandalady.
«Bul fılmge kóptegen áýesqoı ártister qatysqan. Ásirese, kishkentaı ártisterdiń birnesheýi Altaı, Іle aımaǵyndaǵy qarapaıym oqýshylar. Olardyń kirshiksiz kóńilimen somdaǵan oıyny kınoǵa erekshe boıaý berdi», - deıdi kınonyń rejısserleri Dýn Shınýyn men Shapaǵat Murat.
Atalǵan fılm Qytaıdyń birneshe memlekettik kınofestıvalinde júldeli oryndardan kórinip, el ishinde jasalǵan úzdik kınolardyń qataryna engen.
«Shabandoz» fılmi 36-shy Qytaı kınofestıvalinde «Altyn átesh» syılyǵy boıynsha eń tańdaýly balalar fılmi, «Eń tańdaýly mýzyka syılyǵy» sııaqty eki birdeı marapatqa kandıdat retinde kórsetilgen. Osynyń aldynda 30 qyrkúıek kúni Germanııada ótken halyqaralyq jastar kınofestıvalinde «Shabandoz» fılmi BUU-nyń oqý-aǵartý, ǵylym, mádenıet uıymy halyqaralyq balalar kınosy ortalyǵy taratqan eń tańdaýly fılm syılyǵyna ıe bolǵan.
Túrki elderiniń adam resýrstaryn damytýǵa jaýapty vedomstvo basshylarynyń jıyny ótedi – «ÓzA»
2023 jyldyń 23-24 qazanynda Samarqand qalasynda alǵash ret Túrki memleketteri uıymyna múshe elderdiń adam resýrstaryn damytýǵa jaýapty vedomstvo basshylarynyń ekinshi otyrysy ótedi.
Bul týraly búgin ózbekstannyń «ÓzA» aqparattyq portaly habarlady.
Atalǵan basylymnyń málimetinshe, bul is-shara daryndy tulǵalardy memlekettik qyzmetke tartý jáne basqarýshy kadrlardyń rezervin qalyptastyrý boıynsha tájirıbe almasý úshin kommýnıkatsııalyq alań bolady.
Oǵan Ózbekstan, Ázerbaıjan, Qazaqstan, Qyrǵyzstan jáne Túrkııadan 30-ǵa jýyq qatysýshy keledi dep josparlanǵan.
