Qazaq aqyndary Madrıdke attandy

ASTANA. QazAqparat - Qazaq poezııasyn álemge, sonyń ishinde Eýropa jurtshylyǵyna tanytýda úlken qadam jasalyp otyr.  2017 jyly 10 aqpan kúni 19 saǵatta Ispanııanyń astanasy Madrıd qalasynda ádebıet tarıhynda tuńǵysh ret qazaq aqyndarynyń ıspan tilinde shyqqan poezııa antologııasynyń tusaýkeser rásimi ótpek, dep jazady adebiportal.kz .

Antologııany aqyn, aýdarmashy Dáýren Berikqajyuly men «Qazaqstan» Ulttyq telearnasynyń prodıýseri, aqyn Tanakóz Tolqynqyzy  qurastyrǵan jáne bul ıgilikti mádenı shara QR men Ispanııa arasynda dıplomatııalyq qarym-qatynastar ornaýynyń 25 jyldyǵyna oraı uıymdastyrylyp otyr.

Ádebı saltanatty keshke Qazaqstannyń Ispanııadaǵy elshisi Baqyt Dúısenbaev, Ispanııadaǵy laýazymdy qonaqtar qatysady.
 

Tusaýkeser rásimine Ispan Pen klýbynyń bas hatshysy, Neopolıtan jáne Mallarme Parıj akademııasynyń korrespondent-múshesi, Eýropa aqyndary festıvaliniń negizgi quryltaıshysy, ári atalmysh antologııanyń ádebı aýdarmasyn jasaǵan Hýsto Horke Padron qatysady. Hýsto Horke Padron Ispan tili Korol akademııasynyń «Fastenrat» syılyǵyn áıgili Federıko Garsıa Lorkadan keıin alǵan tarıhtaǵy ekinshi aqyn ekendigin aıta ketken jón.

Antologııaǵa Abaı Qunanbaev, Mirjaqyp Dýlatov, Maǵjan Jumabaev, Muqaǵalı Maqataev, Jumeken Nájimedenov, Qadyr Myrzalıev, Tumanbaı Moldaǵalıev, Farıza Ońǵarsynova qatarly ádebıet alyptarymen qatar, Muhtar Shahanov, Kúlásh Ahmetova, Aqqushtap Baqtygereva, Janat Áskerbek, Aqberen Elgezek, Erlan Júnis, Ánýar Bımaǵambet t.b. aǵa, orta jáne jas býyn aqyndardyń shyǵarmashylyǵy enip otyr.

Kasa de Lektor jazýshylar saraıynda ótetin tusaýkeser rásiminde antologııaǵa óleńderi engen Ońaıgúl Turjan, Almas Ahmetbekuly, Dáýletkereı Kápuly, Tanakóz Tolqynqyzy, Dáýren Berikqajyuly, Saǵynysh Namazshameva, Janar Ábsadyq, Anar Shamshadınova, Baqytgúl Babash, Janar Aılasheva óz óleńderin qazaq jáne ıspan tilderinde oqıtyn bolady.