Qazaq ádebıetiniń antologııasyn shetelde qalaı taratady
Bıýro basshysynyń aıtýynsha, qazaq tilindegi shyǵarmalardy BUU-nyń alty tiline aýdarý kelissózderi kezinde ol shyǵarmalardy taratý máselesi de pysyqtaldy. Máselen, antologııanyń aǵylshyn tilindegi nusqasyn Ulybrıtanııanyń Kembrıdj ýnıversıtetiniń baspasy ázirleıdi.
«Bul kisiler biraz oılanyp, óz kelisimin berdi. Bárimiz jaqsy bilemiz, Kembrıdj ýnıversıtetiniń bedeli de, tájirıbesi de mol. Al ýnıversıtettiń janyndaǵy baspa úıi dúnıejúzinde ózin eń alǵashqy baspa úıi dep tanystyrady, 500 jyldyq tarıhy bar. Búginde osy baspa aýdarmaǵa kirisip, qazaq tilinen aǵylshyn tiline aýdarmanyń jolma-jol nusqasyn ázirlep qoıdy. Aldaǵy ýaqytta bul mekeme aýdarmany jınaq úlgisinde basyp, aǵylshyn tilinde sóıleıtin negizgi elderge ózi taratady. Sonyń ishinde Ulybrıtanııa, Amerıka Qurama Shtattary, Kanada, Aýstralııa, Jańa Zelandııa sııaqty memleketter bar. Aǵylshyn tilindegi eki antologııa da (proza men poezııa - avt.) keminde 10 myń danamen basylyp, jańaǵy elderdegi negizgi kitaphanalar men oqý oryndaryna tegin taratylady», - dedi R.Kenjehanuly Astanada ótken jıynda.
Antologııanyń ıspan tilindegi nuqasyn shyǵarýdy osy eldiń mádenıet mınıstrligi qoldady. Áıgili Servantes ınstıtýty keńesshi retinde tartylyp otyr. Al 40 jyldyq tarıhy bar «Vızor» baspa úıi antologııany basyp, Ispanııanyń ózinde jáne Latyn Amerıkada ıspan tilinde sóıleıtin 20 shaqty elderge taratatyn bolady.
«Frantsııada Parıj qalasynyń merııasy bul jobaǵa negizgi qoldaý bildirip, uıymdastyrý sharalaryn qolǵa alyp otyr. Merııanyń nusqaýymen Frantsııanyń ulttyq kitap ortalyǵy jáne Parıjdegi baspa úıi aýdarma jumysyn uıymdastyryp, Qazaq ádebıetiniń antologııasyn Frantsııa, Shveıtsarııa, Belgııa jáne frantsýz tilinde sóıleıtin taǵy 30 shaqty elge taratady», - dep atap kórsetti R.Kenjehanuly.
Mıhaıl Lomonosov atyndaǵy Máskeý memlekettik ýnıversıteti orys tilindegi nusqany ázirlese, Qytaı Halyq Respýblıkasynyń Ulttar baspasy eki jınaqtyń qytaı tilindegi nusqalaryn daıarlaıdy. Al arab tilindegi nusqany daıarlaý mindetin Mysyr Arab Respýblıkasynyń mádenıet jáne bilim ortalyǵy óz moıyna alyp otyr.
Aıta keteıik, «Jahandaǵy zamanaýı qazaqstandyq mádenıet» jobasy aıasynda qazirgi qazaq ádebıetiniń antologııalaryn BUU-nyń 6 tiline aýdarý jumysy qolǵa alynǵan bolatyn. Búginde aǵylshyn, frantsýz, orys jáne ıspan tilderindegi jolma-jol aýdarma jumysy aıaqtalyp, qytaı jáne arab tilderine aýdarý sharalary júrip jatyr.
«Búginde Birikken Ulttar Uıymynyń alty tili - aǵylshyn, qytaı, orys, frantsýz, ıspan jáne arab tilderinde 70-ten astam el sóıleıdi. Barlyǵynda 2,5 mıllıard xalyq turady. Qazaq ádebıetiniń antologııasy eki jınaqtan turady. Árbireýine 30 avtordyń shyǵarmasy endi. Demek, proza men poezııa boıynsha 60 avtor bar. Árbir avtorǵa bir baspa tabaq berilip otyr. Sonda árbir jınaq 400-500 bettiń kóleminde bolady. Bul - óte úlken ári aýqymdy jınaqtar. Avtorlardy Jazýshylar odaǵy iriktep bergen bolatyn», - dep atap kórsetti R. Kenjexanuly.
