Qaıyrymdy jandardyń kómegimen Arystyq kópbalaly eki otbasy baspanaly boldy
Baspana alý baqytyna ıe bolǵan otbasynyń birinde – kámelet jasqa tolmaǵan 4 bala bolsa, ekinshisinde 7 birdeı jasóspirim ósip keledi. Osy kezge deıin jaldamaly páterde, oǵan shamasy kelmeı qalǵan sátterde saıajaı men qaraýsyz qalǵan úılerdi óz kúshimen jamap, jasqap baspana etip kelgen. Memleket tarapynan balalaryna beriletin járdemaqymen jan baǵyp, kún kórýde.
Qos otbasyna qýanysh syılaǵan «Qolǵabys» qaıyrymdylyq qory ıgi iske uıytqy bolyp, úı salyp berdi.
Baspanaǵa muqtaj jandarǵa berilgen eki turǵyn úıdiń jalpy aýmaǵy 101 sharshy metrdi quraıdy. Munda eki bólmeden bólek as jáne jýyný bólmesi, ájethanasy bar. Al qabyrǵasy kúıgen qyshtan turǵyzylyp, ishi-syrty zamanaýı úlgidegi qurylys materıaldarymen qaptalǵan.
Taǵy bir ereksheligi munda jaıǵasqan otbasylardyń turmysy túzelgen shaqta bólme sanyn kóbeıtýge nemese qosymsha qurylys júrgizýge bolatyndaı yńǵaıly joba tańdalǵan.
Qýanyshyna kenelgen qos otbasyn Arys qalasynyń ákimi Gúljan Qurmanbekova arnaıy quttyqtap, qaıyrymdy iske atsalysqan «Qolǵabys» qoryna jáne barsha jomart jandarǵa rızashylyǵyn bildirdi.
