Qaıyńdy ormandy otaǵan petropavldyq kásipker isi boıynsha úkim shyqty
Esterińizge salaıyq, byltyr Petropavl qalasyna kireberiste ornalasqan «Leshoz» aýdany aýmaǵynda kásipker qaıyńdy ormandy otap, jurt narazylyǵyn týdyrǵan edi.
Aldyn ala esep boıynsha, memleketke 41 mln teńge shyǵyn keltirildi. Teksere kele ýchaskeniń 2006 jyly orman qorynan shyǵarylyp, bir jyl ótkesin kásipker Baqtııar Abdýllaevqa qyzmet kórsetý nysanyn salý úshin berilgendigi anyqtaldy.
Soltústik Qazaqstan oblystyq soty baspasóz qyzmetiniń málimetinshe, SQO Jer resýrstaryn basqarý departamenti Baqtııar jáne Famıl Abdýllaevtardy, «ASTEK-AUTO» JShS, Murat Imanbaevty, Serikqan Tólegenovty, Ádil Bagramovty, «Petropavl qalalyq jer qatynastary bólimi» KMM-di sotqa berip, satý-satyp alý, syıǵa tartý sharttaryn, ákimdik qaýlysyn jáne jergilikti atqarýshy organnyń buıryǵyn jaramsyz dep tanýdy surady.
Talapker – SQO Jer resýrstaryn basqarý departamenti bıyl 17 qańtarda SQO mamandandyrylǵan tabıǵat qorǵaý prokýratýrasynan jergilikti atqarýshy organnyń jer ýchaskelerin berý jónindegi zańsyz sheshimderiniń kúshin joıý maqsatynda sotqa talap qoıý týraly hat kelgenin atap ótti.
QR Aýyl sharýashylyǵy mınıstrliginiń Jer resýrstaryn basqarý komıteti «Petropavl qalasy ákiminiń apparaty» KMM-di teksergen. Nnátıjesinde Abdýllaevqa jer ýchaskesin berý kezinde QR Jer kodeksiniń 109-baby 1-tarmaǵynyń talaptary buzylǵanyn anyqtady. Berilgen jer ýchaskesi úı qurylysy aımaǵynda jáne respýblıkalyq avtomobıl jolynyń boıynda ornalasqan. Osyǵan baılanysty, ortaq paıdalanylatyn jer bolǵandyqtan, ol jerden ýchaskeni berýge bolmaıdy.
«Jer ýchaskesin berý kezinde egjeı-tegjeıli josparlaý jobasy ázirlenbegeni jáne bekitilmegeni, jer ýchaskesi Jer kodeksiniń 48-babynyń talaptaryn buza otyryp, aýktsıonsyz berilgeni anyqtaldy. Jospar boıynsha bul ýchaskede úıler qarastyrylmaǵan, ol jerde orman shoqtary ǵana kórsetilgen. Jer ýchaskesi birinshi tehnıkalyq sanattaǵy jol boıyndaǵy jolaqqa jatady», - delingen baspasóz habarlamasynda.
Sot jer ýchaskesi aǵaıyndy Abdýllaevtarǵa zańnama talaptary buzyla otyryp berildi degen qorytyndyǵa keldi. Osyǵan baılanysty sot SQO Jer resýrstaryn basqarý departamentiniń talap-aryzyn qanaǵattandyrdy.
